[dropcap]В[/dropcap]ай гьантрай Дагъусттаннал виваллил иширттал министр, полициялул генерал-лейтенант Аьвдурашид МахIаммадов хьунаавкьунни къуллугърал бурж биттур буллай жанну дуллусса виваллил иширттал органнал зузалтрал кулпатирттащал. Шикку гьуртту хьунни ДР-лул ХIукуматрал председатель Артем Здунов, ванал хъиривчу Рамазан ЖахIпаров, ДР-лул виваллил иширттал министрнал хъиривчу, виваллил къуллугърал полковник АхIмад Баталиев, федерал ва республикалул СМИ-лул зузалт.
Андриана Аьбдуллаева
Хьунабакьаврил мурад бия къуллугърал бурж биттур буллай жанну дуллусса полициялул зузалтрал кулпатру къатта-къушлил дузал хьунсса арцу дулаву (ЕДВ). Шадлугърал даражалий 42 кулпатрахьхьун буллунни арцу итадакьаврил хIакъиравусса Аьрасатнал Виваллил иширттал министерстволул хIукмулул чагъарду.
БувкIминнал хьхьичI ихтилат бунни Артем Здуновлул:
— Къучагъшиву, яхI-къирият цума-цагу адиминал дикIан аьркинсса хасиятру дур. На нава аьраличунал кулпатравасса ура. Ттун кIулли Аьрасатнавугу, дазул кьатIувгу най бивкIсса дяъвилул иширттая, кIулли жула чиваркI, диндалух, миллатрах къабурувгун, жандалия ка ларсун, талай бивкIшиву жула халкь паракьатну оьрму бутланшиврул. ХIайп, укунсса иширттаву оьрмулуцIа хъанай бур цала къуллугърал бурж биттур буллай хьхьичI ххуттай бавцIусса яла кьянкьами, яла ххаллилми чиваркI. Ва жула аьмсса кьурчIишивур. ХIакьину жу зущал хьунабакьаврил мурад так арцу дулаву бакъар, жун ччан бивкIунни зул хIурмат бан, зущал архIал дакIнийн бичин къучагъшиврий жанну дуллусса зул арсру, ласру, ппухълу, — увкунни ванал.
Хъирив ихтилат бунни Аьвдурашид МахIаммадовлул. Ванал бувсунни хIакьинусса кьини къатри машан ласун ягу дан арцу къадуллусса 11 кулпат ливчIун бушиву, миннал документру хIадур буллай бушиву ва ччясса чIумул мутталий, шинал лажиндарай, минналмур масъалагу щаллу бан хIарачат бантIишиву. Аьвдурашид МахIаммадовлул мукунма бувсунни 2010 шиная шихунмай, къуллугърал бурж биттур буллай жанну дуллусса 700 зузалал кулпатран буллушиву квартирарду, къатри дансса пособияртту ва сертификатру.
Ахирданий цинявннал тIутIив дирхьунни МВД-лул къатрал хьхьичIсса къуллугърал бурж биттур буллай жанну дуллусса зузалтрансса гьайкалдануцI.
