[dropcap]И[/dropcap]юньдалул 2-нний ДР-лул БакIчинал кIанайма Владимир Васильев хьунаавкьунни ДР-лул БакIчиначIасса Хъунисриннал советрал члентуращал.
«Билаятрал Президент В.В. Путиннул жулва хьхьичI агьамсса масъалартту бивхьунни, миннувасса ца бур – мискиншиву кIилий чан даву ччясса мутталий. Мугу статистикалий ккаккан дуван къааьркинссарча, агьалинан хIисав хьун аьркинссар маэшат ххуй хъанай бушиву. Жулла республикалул тагьарданий мунил мяъна хъиннура хъун хъанахъиссар», — увкунни Владимир Васильевлул.
ДР-лул экономикалул министр ХIусман ХIасбулатовлул бувсунни 2035 шинайннинсса социал-экономика лядуккан даврил стратегиялия. «Жун бувчIлай бур му давривух хIала буххан буван аьркиншиву циняв агьали, интеллигенция, хъунисри, стратегия инсантурая архсса къадикIаншиврул. Му ххал дигьавривух ва бартдигьавривух гьуртту хьунтIиссар Халкьуннал Мажлисрал депутатътал, бартдигьай властьрал органнал, муниципал сакиншиннардал, вузирдал, элмулул бизнесрал, жяматийсса организациярттал вакилтал, личIи-личIисса иширттал экспертътал, циняв мурадлувсса инсантал», — увкунни министрнал.
Хьунабакьаврий гьаз бунни мукунма цаймигу масъалартту.
