[dropcap]Ч[/dropcap]ара бакъасса ветеринариялул электрон сертификация щурущи дуллай байбишин ливчIун бур ца барз. Закондалийн бувну му щурун аьркинссар гьашину июльданул 1-нния тиннай.
Амма республикалул хозяйствартту инкар хъанай дур «Меркурий» тIисса информациярттал системалий сияхIрай дацIан. ХIакьинусса кьини 105 азарунния лирчусса хозяйстварттавату «Меркурий» системалий сияхIрайн ларсун дур дурагу 1% хозяйстварттал.
Республикалий ветеринариялул электрон сертификация щуруншиврул тамансса давуртту дуллай бур: жаваблувсса ведомстварттал вакилтуращалсса личIи-личIисса хьунабакьавуртту, батIавуртту, ккуркки столлу, муния буслай бур СМИ-лий ва официал сайтирдай. Майрал 28-нний хьусса видеоконференциялий ДР-лий му ххуллий дуллалисса даву АьФ-лул шяраваллил хозяйствалул министрнал 1-ма хъиривчу Жамбулат Хатуовлул шакъархьссаннун ккалли дунни.
Мукунмасса кьимат бивщунни АьФ-лул шяраваллил хозяйствалул министрнал хъиривчу Евгения Непоклоновалгу июньдалул 1-нний хьусса видеоконференциялий.
ДР-лул Россельхознадзорданул Управление му иширал буруккинттарай бур. Мунияту лабизаврил чагъар чивчуну бур ДР-лул ХIукуматрал председатель Артем Здуновлуйн.
