[dropcap]У[/dropcap]ттигъанну жула республикалиясса студентътал ва диплом лавсъсса жагьилсса пишакартал гьуртту хьунни «IТ – Планета 2017/18» тIиссаХI Халкьуннал дянивсса олимпиадалий. Ва гьар шинах жула билаятрай дувайсса, хъуннасса сий дусса олимпиадар.

Залму АьбдурахIманова
[dropcap]В[/dropcap]анил лагрулий ИКТ-аралул личIи-личIисса бяст-ччаллу, конкурсру сакин дурну дикIайссар. Ванил сакиншинначитуравух дунияллийх цIа ларгсса Orakl, 1C, Cisko, Huawei, CKB Контур, ГНУ/Линуксцентр, InterSvstems тIисса ва цаймигу компанияр­тту дикIайссар. Экспертътуравух мукунма гьуртту хьун оьвчай­ссар федерал ва регионал компаниярттал пишакартурайн.
«IТ-Планета 2017-18» олимпиада дувайссар граждан общество хьхьичIуннай даву мурад­рай, Аьрасатнал Федерациялул Президентнал грант ишла дурну.

[dropcap]А[/dropcap]ьмну гьашинумур олимпиадалий 11 билаятраясса 20000 студент ва жагьилсса пишакартал гьуртту хьуссар. Жулла республикалия мунивух 67 инсан гьуртту хьуну ур. Миннава 6 гьурттучи, цивппагу ДГУ-лул студентътал, циняр конкурсир­ттайгу ххув хьуну, лайкь хьуну бур утти финалданий гьуртту хьун. Вайннавасса ца – ХIажимирзаев Шамил ур жула лакку оьрчI. Ванал ппу Муси ва нину Ида бур ГьунчIукьатIрал шяраватусса. МахIачкъалаллал 39-мур школа-лицейгу къуртал бувну, Шамил дуклан увххун ур университет­равун. ЦIана ва 2-мур курсирай дуклай ур. Дуклайгу ур цал архIал кIива факультетрай – очнайну – математикалул факультетрай ва заочнайну – юридий факультетрай.

Утти Шамил ва ванащал ххув хьусса студентътал гьур­тту хьунтIиссар Тюменнал индустриал университетраву июньдалул 1-4-нний хьунтIисса финалданий. Цалчинмур ятIапрай язи бувгьусса 350 финалистътурал дянив хьунтIиссар IТ – технологиялуцIун бавхIусса бяст-ччаллу. Финалистътуравух буссар Украиннавасса, Белоруснавасса, Арманинавасса, Къазахъисттаннаясса, Молдавиянавасса ва цаймигу паччахIлугъирттаясса оьрмулул 25 шиннардия ликъавчусса жагьилсса пишакартал ва студентътал.
Шамиллун ва ванащалсса жагьилтурангу чIа учинну жула чулухасса тIайлабацIу ва ххувшаврищал Тюменная зана шаву.