[dropcap]М[/dropcap]айрал 28-нний ДР-лул БакIчинал кIанайма Владимир Васильевлул дунни нюжмардий цал дайсса батIаву. Муний ххал бивгьунни «ххютулу» зузисса инсантал чан баврил, яни ми «чаннайн» буккан баврил хIакъиравусса масъалартту.
— Ва хъинну агьамсса темар. Зун кIуллихха, билаятрал Президентнал тапшур бунни мискиншиву кIилий чан дуван. Му захIматсса масъалар. Зузи кIанттурду дузал къабарча, зун, захIмат бан бюхъайсса инсантал давурттал щаллу къабарча, жущава му масъала дузрайн буккан буван къахьунтIиссар. ХIакьинусса кьини жулла республикалий 25 азаллий 600 инсан лавсун ур давурттал щаллу байсса органнай даву дакъасса инсантал хIисаврай.
Амма Дунияллул халкьуннал дянивсса захIматрал сакиншиндарал методикалийн бувну жучIава даву дакъасса хIисавну ур 163 азаллий 400 инсан. Жува хIакьину аьркинссар му масъала ххал бивгьуну, ца пикрилийн бучIан», — увкунни Владимир Васильевлул. Мунал мукунма бувсунни хIакьинусса кьини ашкара увну ушиву 10 азаллий 500 инсан, личIи-личIисса давурттай зий унува, чувчIав сияхIрайн къалавсъсса, ва мунияту зий акъассаннун ккаллисса. Миннавату 8 азарунная ливчусса инсантал зий бушиврул хIакъиравусса захIматрал кьутIирду чичин бувну бур, ягу ми сияхIрайн лавсун бур налогирттал органнай.
Васильевлул гьаз бунни ЕГЭ дулаврил масъалагу. Инсантал давурттал щаллу баврил хIакъираву ихтилат бунни ДР-лул экономикалул министр ХIусман ХIасбулатовлул. Мунал бусаврийну, 2015-2017 шиннардий республика «ххютулу» зузими чан личIан баврил Аьрасатнал регионнал рейтинграй 53-мур кIанттая 24-мур кIанттайн лархъун дур, Ухссавнил Ккавкказуллал федерал округрал регионнал дянив тIурча 2-мур кIану бугьлай дур, Ставрополлал улклул хъирив. Министрнал бувсунни агьали давурттал щаллу бансса, зузими «ххютула» буккан бансса ххуллурдаягу.
Мува масъалалул хIакъираву ихтилат бунни ДР-лул виваллил иширттал министр Аьвдурашид МахIаммадовлулгу. Мунал бусаврийну, гьашину миграциялул сияхIрайн лахъан увну ур 22 азара инсан.
БатIаврий ххал бивгьунни цаймигу масъалартту.
ХIадур бувссар
ХI. Аьдиловлул
