1965-ку шиная шинай хIакьинунин ДГУНХ-рачIасса Инженерный колледжраву (хьхьичIвасса Строительнал техникум) дарс дихьлай ур Оьмар­дул арс АхIмадов Сергей.

Залму АьбдурахIманова
[dropcap]С[/dropcap]ергей ур ЧукIуннал шяраватусса. Ванал ппу Оьмар дяъви байбишин хьхьичIсса шиннардий цал Лакрал райондалул РОВД-лул хъунаману, яла Бабаюртуллал райондалий мува къуллугърай зий ивкIун ур. 1940-ку шинал къачагътурал бандалийнсса данди бацIавриву жандалуцIа хьуну ур.

Гъумук байбихьулул классругу бувккуну, Сергейл гьан-учIан бигьасса кIанттайсса ЦIахъардал школа къуртал бувну бур. Дарсирдах гъира бусса оьрчIал, гихуннайсса кIулшивуртту ласун­сса мурадрай, ссапар бавхIуну бур Москавлив. 1949 шинал, дуллуну экзаменнугу, увххун ур Москавуллал Инженерно-землеустройствалул институт­равун. Ва бивкIун бур хъинну сий дусса, паччахIнал заманнай­сса Межевой институтрал гьанулий ябувсса дуккаврил идара. Дук­лай уна Сергей машхул хьуну ур кканккай лечайсса спортрахухгу.

[dropcap]И[/dropcap]нститутрал цIания гьуртту шайсса ивкIун ур личIи-личIисса бяст-ччаллавух, студентътурал олимпиадарттай. ХIакьинусса кьинигу ванал архивраву яхьуну дур хьхьичIунсса кIанттурдах дуллусса грамотартту, хIурматрал лишанну.
Дуккавугу къуртал дурну, ва зана хьуну ур Дагъусттаннайн. Хасъсса кIулшивурттащалсса диплом канихьсса жагьилсса пишакар най уна кьамул увну ур Каспий хьхьирицIухсса аьрщирду ххал дигьлагьисса Ухссавнил-Ккавкказуллал экспедициялувун.

Ми хъиривлаявурттугу дувайсса диркIун дур Ставрополлал крайрайсса Георгиевск тIисса шагьрулий. Вайннал пишалул мурадгу бивкIун бур халкьуннахьхьун ишла дан дулуннин хьхьичI лухччив, хъирив лавну, ххал дигьава­н­сса. Яла ми лухччив колхозир­ттахьхьун зузи дан тапшур дайсса диркIун дур. Цаппара шиннардий ва касмулуха зийгу ивкIун, Сергей МахIачкъалалив зана хьуну, Проектный институт­равун зун кьамул увну ур. Ши­ккумур пишагу цIу-цIусса лахъ къатри, хъуни идарартту бан хьхьичI, гай дан нани­сса аьрщарал хIалкьазия кIул баврищал бавхIусса бивкIун бур.

1965 шинал Сергей МахIач­къалаллал Строительнал техникумраву дарс дихьлан увкIун, хIакьинусса кьинигу зий ур сей­с­мостойкий строительствалул кафедралий.
Оьруснал миллатраясса ванал оьрмулул дус Галина Васильевналгу 50-нния лирчусса шинну дурну дур Дагъусттаннал педагогикалул университет­рал картографиялул ва топографиялул кафед­ралий. ЦIана пенсиялий бур.
Сергей Оьмаровичлул дарс дирхьусса студентътал зий бур личIи-личIисса арардаву. Бур миннавух ванал цала даврил уртакьтал хьуссагу: цала муаьллимнащал вава кафедралий сайки кьура шинал мутталий зий бур жул хьунабакьаврил сиптачи, Ххюлусматусса Къимпаева Аьйшат Батталлул душ ва ЧIятусса Кьадиева Людмила Кьадинал душгу. Цала муаьллимная бусласисса ихтилат­равугу вай кIивагу, ца зумату кунма, кIицI лаглай бур Сергей Оьма­ровичлул хасиятрал авуршиву, дакI хъиншиву, аькьилшиву. Колледжраву ванал бусрав-сийгу хъуннасса дур.

Ва ур АьФ-лул пишакартурал кIулшивуртту дулаврил аралул хIурматлувсса зузала.
Сергей Оьмаровичлущал ихтилат бан лавгсса кьинигу ттун ва лявкъуна цала даврихух лавгун. ЧIяву хаварду ба­къасса, ххишала акъа интеллигентсса, цаятуванияр, цала буттая, Вьетнамнаву талай ивкIсса уссия, Леххултрал училищагу къуртал бувну, цIана Байконурдай зузисса цала арсная буслай ия ва ттухь.

Тай захIмат-жапасса дяъвилул шиннардий Лаккуй школагу къуртал бувну, цана цувалу, билаятрал хъуншагьрулийн кIулшивурттал хъирив лавгсса ванан хIакьину хъинну оьлу бизлай бур дуккаврих жагьилтурал къулагъас аьркинссаксса хъуннасса дакъасса иш. Дарсру лахьлан ччикунсса журалул каширдугу дунура, студентътурал аьдада харж дуллалисса чIумуй аьтIий ур.