«Ватан ниттил тIюваяр дайдишайсса, инава чув ялапар хъанай ухьурчагу, мархри кIиккур бусса» тIисса калима мяънанугу, мураднугу хьуну дур Щардал шяраваллил жагьилтурал сакин дурсса ихIсандалул фондрал. Ва калима гьануну ларсун дай гьарцагу акция. Акциярдурив вайннал дайссар ччя-ччяни.
Зулайхат Тахакьаева
[dropcap]Г[/dropcap]ьарца ххуллункьини, шяраву ва шагьрурдай ялапар хъанахъисса жагьилтал бавтIун, дайссар субботник. Машгьур дуллай бур шяраву спорт. Ватан ххирашиву Щардал жагьилтал, мукъурттий бакъа, иширттайну ккаккан дуллай бур. Чансса къадурунни мих-тих ялапар хъанахъисса чиваркIуннал цала сипталийну, цала каширдацIух лявхъу кIану лавай бансса давуртту. Бувну къуртал бавай бур сайки 10 млн. къурушран бавцIусса футболданул майдан.
[dropcap]Б[/dropcap]увунни ккурчIа. Мукьра шинай лув-ялув лайкьсса даражалий дурунни экстремистурал оьрмурдацIа бувсса Лакрал райондалул низам дуруччай органнал зузалтрал аьпалунсса футболданул турнир. Ва му гихуннайгу дяличIан къаритансса ниятрай бур.
Шяраву ялапар хъанахъими жагьилталгу, зунсса кIанттурду бакъар тIий, мивун-тивун багьлай бакъарча, шяраваллил бакIчинал лагма лавгун, ххуллурду бакьин буллай, архния цала гужирдацIух щин дуцлай бур. ИхIсандалул фонд чIалансса кумаг буллай дур ахIвал кIюласса кулпатирттангу.
Ва ххуллухгу, бигьалагай гьантрай бувкIун шагьрурдаясса жагьилтал, дурунни хъуннасса субботник. Бяр буккан бувунни, Зумаритавал байрандалул хьунийн марцI дурунни хIатталу.
Муния махъ, жагьилтурал цалла дукрардугу дурну, тIивтIунни шяраваллил агьулданул Зума итадакьинсса ссупра.
ДахIалай зунгу, бигьалагангу кIулсса Щардал жагьилтал. Цайми шяраваллал жагьилтурангу эбратну хьуннав зу дуллалимур.
