ХIакингу, учительгу, та-бухьурчагу, хIисавну бикIай ца хIурмат ххисса пишалул заллухъруннан. Бунияла, ца жува ххассал буллай ур азардаща, гама тIитIлай ур жула хьхьичI дунияллул караматшивуртту. Вай дурхха инсаннан цалчин аьркинсса затруну хъанай. Вай духьурча, оьрмулул хияллугу чIявуну бартлагай.
Уттигъанну на, хатIалий куна, кIул хьура Ккуллал шяраватусса АхIмадлул арс Кьурбанов МахIаммадлущал.
ХIажимурад ХIусайнов
— На увссара 1930-ку шинал июль зурул 1-нний Ккуллал шяраву. Дяъвилул шиннардий гъинттулсса каникуллай на шяраваллил бюрчурдичIан лагайссияв. Га чIумал 5-мур классрая лавайми оьрчIру школалийн лагайссия октябрьданул 1-нний. Дяъвилул шиннардий зий ивкIун тIий, на ура дяъвилул ветеран.1950-ку шинал къуртал бувссар Гъумучиял педучилище. Жу бияв га училищалул махъва-махъсса выпуск. Ттущал дуклай икIайссия зул Вихьуллал шяравасса, аьпа биву, МахIаммадов Худай. На яла зун ивкIссияв Ккуллал 1-мур школалий, дишайссия физкультуралул ва географиялул дарсру.
Дарсру дихьлай уссияв байбихьулул классирттахьгу, 18 шинай, лавайми классирттахь тIурча – 40 шинай. 1973-ку шинал къуртал бувссия Дагъусттаннал пединститутрал географиялул факультет. Аьмну учительнал касмулий зий хьуну дур 58 шин. 1978-ку шинал на хьуссара СССР-данул учительтурал съездрал делегат. Ккуллал райондалия, ца на акъа, га съездрал делегат цама акъая. Гара шинал ттун дуллуна «Дагъусттаннал лайкь хьусса учитель» тIисса цIа. 1984-ку шинал ттун дуллуссия «РСФСР-данул лайкь хьусса учитель» тIисса цIагу.
На ттула оьрмулул дус, аьпа биву, Савдатлущал инсантуравун буккан бувссар кIия арс ва шанма душ. Ттул бур цIана 12 оьрчIал оьрчI ва вайнналгу 13 оьрчI, — буслай ур МахIаммад.
Укун цала бивтсса оьрмулул авадансса ва бусравсса ххуллул шачIанттая кутIану бувсуна ттухь захIматрал ва дяъвилул ветеран, ххюцIаллий мяйра шинал манзилданий оьрчIахь дарс дихьлай ивкIсса, хIакьсса педагогнал цIанин лайкьсса инсан АхIмадлул арс Кьурбанов МахIаммадлул. ЧIа тIий буру ванан оьрчIал ва оьрчIал оьрчIал ххари уллалисса чIярусса кьинирду!
