[dropcap]М[/dropcap]иллатирттал дянивсса журналистикалул (межэтническая журналистика) Гильдиялул сипталийн бувну, мартрал 20-нния июньдалул 1-ннийн бияннин хьуссар «Аьрасатнал оьрчIру» тIисса цIанилусса шакиллал конкурс. Муний интернет-голосованиялий яла чIявусса чIурду буллуну бур ДР-лул Миллатирттал иширтталсса бувайсса министерствалул отделданул пишакар Эсуб Маллаевлул рирщусса суратрахлу.
Конкурсрал агьаммур мурадруну хъанахъиссар никирттал дянивсса дахIаву, Аьрасатнал халкьуннал ва культурардал аваданшиву миллатрал лаххиялийхчин чIалачIи даву, кулпатирттаву халкьуннал культуралухсса, му цIулаган даврихсса гъира-гьавас лавай баву.
Конкурсравух гьуртту хьун бюхълай бивкIссар Аьрасатнал Федерациялул гьарцагу инсаннаща, цангу конкурсрайн чара бакъа гьан дуван аьркинну бивкIсса Аьрасатнал халкьуннал яннардавусса оьрмулул 14 шинавун бияннинсса оьрчIал 3-ннияр ххишала дакъасса суратру.
Ва конкурсрай чIявусса чIурду буллусса Эсуб Маллаевлул «КъавтIаврил бущилий» тIисса суратрай бур миллатрал янналуву къавтIун бизлазисса чIивисса дагъусттан душ. Сурат рирщуну дур Къарабудагъккантуллал райондалий, ДР-лул Миллатирттал иширтталсса бувайсса министерствалул «Цукун ялапар хъанай ура, чIаххувчу?» тIисса проект щаллу дуллалисса чIумал. Интернетрай ва суратрахлу буллуну бур 35 850 чIу.
Эсублул конкурсрайн кIира сурат ялагу гьан дурну дур. «ЧIава музыкантътал» тIимур суратрахлу буллуну бур 31 250 чIу.
Му суратгу дурну дур Хасавюртуллал райондалий, вава министерствалул «Кунаки» тIисса проект щаллу дуллалийни.
Жюрилул яла чIявуми чIурду буллусса давурттал автортуравух бур Лабытнанги шагьрулиясса Марина Яр. Мунил «Гьавалул ччимур тагьарданий дуллалисса даву» тIисса суратрай ур ненецнал кIинттулсса янналувусса (малица) оьрчI. Конкурсрай ххув хьусса Эсублун ва Маринан булунтIиссар планшетрал компьютерду.
Гьашинумур конкурсрайн тIайла дурккун дур Аьрасатнал личIи-личIисса регионнаясса автортурал 120-нния лирчусса суратру. Конкурс цурдарив ххюйлчинни дуллалисса.
Асия КьурбанмахIаммадова
