[dropcap]М[/dropcap]айрал 29-нний «Дагестан» РИА-лий журналистътуращал хьунабавкьунни уттигъанну ДР-лул кIулшивуртту дулаврил ва элмулул министрнал къуллугърай бивтсса Уммупазил Оьмарова.
Залму АьбдурахIманова
Журналистътурал суаллахьхьунсса жавабру дулуннин министрнал бувсуна цала пишакартурал цIана щаллу бан багьлагьисса масъаларттая. Миннувасса ца яла агьаммурну бур вай гьантрай щала билаятрай нанисса ЕГЭ-луцIун бавхIумур масъала . Уттинин дуклаки оьрчIал дуллуну дур информатикалул, географиялул ва математикалул экзаменну. Аьмну республикалий хIадурну бусса бур экзаменну кьамул дуллансса 68 пункт.
У. Оьмаровал бусаврийну, гьашину республикалий Цасса паччахIлугърал экзамен дулунтIиссар 12,8 азара дуклаки оьрчIал ва ОГЭ дулунтIиссар 9 класс къуртал бувсса 34 азара оьрчIал.
|
— Республикалий махъсса шиннардий ЕГЭ дулавриву цIа дансса дахханашивуртту хьуссар. Ва жула цинявнналагу аьмсса хIарачатри. Гьашину экзаменну кьамул дуллалисса кIанттурдай аьмну 5 азара инсан зунтIиссар, миннавухва буссар федерал экспертъталгу, волонтертал ва техникалуха зунсса пишакарталгу, — увкунни министрнал.
У. Оьмаровал мукунма кIицI бувунни мусил медаллацIун бавхIумур суалгу. Ванил бусаврийну, шиная шинайн выпускниктал чан хъанай бунугу, гьарза хъанай бусса бур медаллу ларсми ва ласунми.
«Гьашинусса шингу медаллан лайкь хьусса оьрчIру гьарзасса шин дур, мукунсса 1860 оьрчI ур. БувчIлачIисса зат бур медаллу ласун хIарачатрайсса дуклакисса оьрчIая жува ххари хьун аьркиншиву. Амма, мюршну хъирив лаярча, кув шагьрурдай гьарца ххюлчинсса дуклаки оьрчI «медалист» хъанай ур. Жу дурсса диагностикалул ккаккан бувунни мукунсса оьрчIал 34 % бушиву буниялагу медаллан лайкьсса», — тIий бия Уммупазил Оьмарова.
Министрнал чIурчIав дурунни республикалул школарттал аьмсса тагьарданийгу. Ванил бусаврийну, 133 школа жучIава бусса бур багьайкун бакьин бан багьлагьисса, 131 школагу мукунма бусса бур хъинну нигьачIисса тагьарданий, 546 школа бусса бур капитал ремонт дуван багьлагьисса.
Пресс-конференциялул ахирданий министрнал журналистътурал суаллахьхьунсса жавабру дуллунни. Госдумалул ххал дигьлагьисса ниттил мазру лахьхьаврицIун дархIусса закондалул хIакъираву Уммупазил Оьмаровал кIицI бувунни цуппа хIадурну бушиву му иширал ялув багьайсса ххуллу-хха ккаккансса жяматраясса вакилтурах.
Мукунма бувсунни ниттил мазрал дарсирдал тагьар цаппара школарттай къаххуйсса, хъинну хьхьарасса даражалий душивугу.
— Республикалул школарттай аьмну миллатирттал мазурдил дарсру дишин 56 учитель иялну акъар. Биялну бакъар оьрчIансса луттирду, учительтурансса хасъсса литература. Тагьар мяйжаннугу къаххуйсса дур. ЦIана ттуща ттигу цичIав учин къахьунссар, на ялугьланна зух, журналистътурах, жяматирттал суккушиннардах, — увкунни ванил.
