[dropcap]Л[/dropcap]акрал, Ккуллал ва ЦIуссалакрал районнайсса агьалинан, маэшат кIюламиннан, ятинтуран, мушакъатминнан, дарур­тту ласунсса каши дакъаминнан ка-кумаг буван ччисса ухьурча,буван хьунтIиссар «Инсан» фондрайхчIин: 4276 6000 4873 1810 Сбербанкрал карточкалийн ягу 8 (963 ) 414 -11-77 номерданийн (Билайн) арцу дирчуну.

---

[dropcap]Р[/dropcap]еспубликалий машгьур­сса «Инсан» тIисса ихIсандалул фондрал, хасну Лакрал, Ккуллал ва ЦIуссалакрал районнал агьалинан кумаг буллансса филиалгу тIивтIуну, шанна шинни ахIвал кIюласса, кьини дурк­сса кулпатирттан кумагру буллай. Зумаритавал зуруйгу ва фондрал дунни ххуй-ххуйсса давурттив. «Гьарцагу тIювайн – дуканмур» тIисса акциялул лаг­рулий дартIсса 81 азарда къурушрах машан лавсун, дукиялул 180 кьуцуру бавчIунни ятинтал хъуни буллалисса ва ахIвал кIюласса кулпатирттайх. Аьмну тIурчарив, уттинин 2000 кьуцуру биян бувну бур фондрал лак­рал мюхтажсса ужагъирттайн. Ми иширттан харж дурну дур 900 азарда къуруш.

Мудангу аьркинмур духхин, диян дуван вайннан кумаг бай­сса бур волонтёртурал. Ттигъаннугу, гьамин, волонтёртурал кумаг бувну бур Гъумук, Ваччав ва ТIюхчарав зумаритаврил ссупра тIитIин. «Ятинтал школалийн хIадур буванну» тIисса акциялул лагрулий 31500 къуруш дартIун, школалийнсса аьркинмур ларсун дур ятинсса оьрчIан. Ххувшаврил ва Зумаритавал байраннал гьантрай ветерантурачIан бивну, миннан бахшишру дуллуну дур.

«Инсан» фондрал Лаккуй­сса вакил Ислам ХIажибуттаев Ккуллал райондалул имам Му­хIаммадвакил Дадаевлущал архIал МахIачкъалалив яхъанахъисса 1-мур ЦIувкIратусса фронтовик СантIуев Аьли­л­лу­чIан шаппай бивну бур ссайгъатирттащал, мукунма ГьунчIукьатIув бивну бур цамагу фронтовикначIан – Ибрагьимов ЖамалуттиннучIан.
Даруртту ласунсса каши да­къаминнан дарурттах харж дурну дур 42 азарда къуруш.

Фондрал аякьалийн лавсун бур Ваччиял шяравусса Фиалка Аьбдурашидовал ужагъгу: ва мукьва ятин хъуни буллай бур, вай яхъанахъисса къатри лекьавай дур. Фондрал бакIрайн лавсун бур ва иширалссагу буван.
Ислам ХIажибуттаев буслай ур мудан фондран ка-кумаг буллалисса, сайки гьарцагу акциялул давривух гьурттушинна дуллалисса лакгу бушиву. Ттигъанну фондрал цIаниятусса Барчаллагьрал чагъар буллуну бур мукунсса инсаннан – Сулайманов Арсланаьлин.

Фондрайн бучIайсса бур ца­лла цIа кIицI къаларгун кумаг буван ччиссагу. Ттигъанну увкIун ур закат хIисаврайсса кумаг буван ччисса бизнесмен, муналгу ятинтуран ва мюхтажминнан кумаг буван 200 азарда къуруш арцул дуллуну дур.

Фондрал цIаниятусса Барчаллагьрал чагъарданун лайкь хьусса, машлул аралуву зузисса Хуцаева КьурбанпатIиматлул гьарцагу акция дайдишиннин дуки-хIачIия кьюркьуну ласун­сса кумаг бувайсса бур. Гьаннайсса, кумаг буван ччинал бувансса ххуллу-чаран лякъайсса бур. Шайсса кумаг бавугу чирилунссар.
Фондрал дуллалисса ва дур­сса давурттаясса хавар социал сетирдай, (Инстаграмрай дур вайннал страница) байбишай «Дуссар хъиншиву!» тIисса калималийну. Ванийну ттулвамур текстгу къуртал буван: дуссар хъиншиву, буниялттунгу! ХIала буххияра зугу!