«Илчи» кказит буклай байбивхьуния шихунмай, цуппа ца номер лях гьан къабивтун, буккайминнавасса ца бур Ххутрал шяравасса Разият Мутаева. Разиятлул оьрчIнийсса оьрмугу бигьасса къабивкIун бур. Ванил нину ХIарисат ва бутта МахIаммад шяраву чIявусса захIмат бивхьусса, хъинну хIурмат-кьиматрайсса кулпат бивкIун бур. Ппу МахIаммад канил пишалул хъинну итххявхсса инсан ивкIун ур. Ванал, дару-дарманну бувну, цикссагу инсантал хъин байсса бивкIун бур. ХIарисатгу бювхъусса, дан-дитан кIулсса, чIануйн багьсса душ бивкIун бур. Ва буцин ччисса жагьилталгу чIявусса бивкIун бур.
Имара Саидова
— Жу кулпатраву бивкIру ряхва оьрчI. Ттун нину ляличIинура ххирасса дикIайва. Ужагърай дурсса дукра ниттичIан диян къадурну бигьа къалагайвав. Базаллуву хьхьичIра-хьхьичI дурксса ахъулсса ларсун, ттула оьрчIан дулуннин, на нитти-буттачIан диян дан лагайссияв. Буттахъал къатригу ттучIан личIину гъанну дакъая, амма ххуллул архшиву тачIав хIисав къашайва, — тIий, буслай бур Разият.
1953 шинал Ххутрал шяравун увкIун ивкIун ур Архсса Востокрай аьралуннаву къуллугъ буллай ивкIсса оьвхъусса жагьил – Мутаев Шагьмилав. Ванан Разият цалчин ххал шайхтува дакIнил лавсун бур. Шяраву ца яла ххуймур душгу язи бувгьуну, бувцуну, лавгун ур махъунай къуллугъ буллан. Тийх Разиятлул бувну бур кIинничалт.
1961 шинал, ласнал къуллугъ бартлагайхту, вайннал кулпат бивзун бур Дагъусттаннайн. Махъунай нанисса чIумал, Шагьмилав итакъаакьлай ивкIун ур, лахъсса чингу дулуннуча, Камчаткалийсса ягу Уссурийскалийсса гарнизондалийсса штабрал хъунаману ацIу тIий. Му бакъассагу, вайннахь ихтияр диркIун дур Аьрасатнал ччимур шагьрулий, цалва язи бувгьуну, ялапар хьунссагу. Амма, Ватандалухсса ччаву ва гъан-маччанахсса мякь ялтту бувккун, бувкIун бур вай шаппайн.
Разиятлул агьлу-авлад бивкIун бур дин-чак дусса. ЧIивинияцIава Кьурандалийн занай бивкIсса Разиятгу, хIурхIацIакул байбивхьуну бур цIуницIа дин дуллай. Аьрасатнаву ялапар хъанахъинигу ванил, цила бутта ххари ан, аьраб мазрай чагъарду чичайсса бивкIун бур. Гъурбатрай ялапар хъанахъисса душнин аьраб маз хъамакъабитаврия рязисса ппугу Разиятлуйн барчаллагьрай ивкIун ур. Цила ласнащал Разиятлул лавхьхьуну бур Кьуран буккин. Диндалухун багьсса ца хъамитайпалуцIагу лавхьхьуну бур зикри бишин. Бартлавгун бур Разиятлул дакIнийсса сайки цинявппа мурадругу. Мукьийла хIажлийн гьансса каши-кьудрат дуллуну дур ванихьхьун Заннал. Разиятлул кьунияхъайсса шиннардил лажиндарай зикри къабивхьусса, мавлудру къадурккусса кулпатру, Ххутрал жяматраву бакъассагу, цайми щархъал дянивгума чансса бакъа бакъахьунссар.
Хъамакъабивтун бур Разиятлун ва ванил оьрчIан буттал шяравунсса ххуллугу. Ванил арс, цува шагьрулий хъуна хьуну унугу, буттал шяраваллих ччаву дусса, икIайкунсса патриот ур. Цаппара шиннардил хьхьичI арснал МахIаммадлул, ниттин бахшиш даву мурадрай, дурну дур буттал шяраву къатри. Муния шихунмай, гьар гъи дайдирхьутари, Разият лагайсса бур буттал шяравун, му кIия бучIаннин мунил дуаьрттах мякьну ялугьлай бикIайсса бур шилумур жямат.
Разиятлул
дуаьрттавасса ца
Дуаь идавсил даннав,
Амин малаиктурал учиннав,
Кьамул Аллагьнал даннав.
Я жул ххирасса Зал, Ина жу ччинацIа махIрум мабара.
Ина жу загълуннал зулмулуща, пасикьнал макрулуща, дуржагьраща, ссиратIул ламуща буручча, Аллагь!
Ина жу хьхьунил балаллуща, кьинилул мусиватраща, мурчаща, цIараща, щинаща, апатIирттаща, винма кIулсса, жун къакIулсса арулцIалазарвагу балаллуща буруччин ба, Аллагь.
Уссурссуннайнгу, щарнийнгу, жяматрайнгу барачат ликкан ба.
Дунияллияту щалиххан бити. Ахират тIитIин дува, цала-цала дакIнийсса мурадирттайн биян ба, Аллагь!
Хъиривппа-хъиривсса ссихIирачIагу «Ашгьаду Алла-илагьа иллаллагьу ва ашгьаду анна МухIаммадун расулуллагь» учинсса тавпикь дула, Аллагь.
Аманатгу вихьхьунма, щукругу Вийнма, Аллагь. Ина жул аввалгу, ахиргу тIайла дацIан да. Ахирданийн бивукун, имандалиятугу арх буцан мабара, Аллагь.
Я Аллагь, жу бивхьусса зикри, дуртсса салават, дурсса дуаьртту, ца-ца хIарпирая аза-азарда хьун дурну, жуятусса ссаламну, ссайгъатну, Виятувасса рахIму-цIимилийну кьамул да, Аллагь!
