[dropcap]М[/dropcap]ай зурул 26-нний, хьхьунил ссят ацIния кIира хьусса чIумал, Санкт- Петербурглив хьунни дунияллул сенсациялун ккалли бувсса иш: 1-мур ЦIувкIратусса цIанихсса пагьламантурал варис Расул Абакаровлул Нева неххал ялтту пагьламан лархъунни, Дворцовый мострал ялтту архъан дархIуну.

---

ПатIимат Рамазанова
«Санкт- Петербург» тIисса телеканалданий тIайланнасса трансляция дия, мухлукьат халкьуннал тамашалий бувккун бия уттинин тарихраву къавхьусса иширал бардулт хьун, сивсусса жагьилнал гьунарданий тамаша буван. ДакIнихтуну мукIру хьунна, ттулгу къюкI дацIавай лирчIуна, Расуллул тараза кIунттил бугьайхту, ламуйх бавхIусса хьхьуттайх хIаллих шару ласлай ачайхту. Расул ва зумания та зуманив ияйхтурив, шадсса чIурдал ва гурсса хъатурдил чIурдал симфониялул оркестрданул (Фабио Мастранджелолул «Северная симфония» оркестр) чIугума заэв бу­ккан бувна. Цува увсса ва хъуна хьусса Петербург шагьрулул 315 шин шаврил юбилейран гьакссагу хъинсса бахшиш дунни Расуллул.

Хъирив кьини Аьрасатнал циняв телеканаллай ихтилат Расуллул гьунардания бия. Сайки циняв машгьурсса централ каналлал цIусса хавардавух ва иш гъирарай кIицI буллай бия.
Расуллул ппу, Мухтар, Да­гъусттаннал лайкь хьусса артист, зий уссар Петербургливсса «Мю­зик-холл» театрдануву, буттал ппу Щамхалгу, аьпа биву, ми­ккува зий уссия. Абакаровхъал тухумрал хIурмат шагьрулул агьулданул дянив лахъну буссия ва буссар.
Ппухълуннал гьунардал ттугъ бюхттулну гьаз бунни Расуллулгу. Ванал гьунарданий хIайран хьусса нагу оьвкуссия РасуллучIан, ЦIувкIуллал жямат­рал ва «Илчилул» буккултрал цIанияту барча уван.

— На Питердай хъуна хьуну ура, амма мудангу дакIниву цIакьну буссар нава цIувкIуллал пагьламантурал наслулиясса, ттулва мархри Лаккуяту бушиврул пикри. Сант дагьтари, на Дагъусттаннайн учIара, буттал шяравун ияра. Зул кказитрал ттух мудангу къулагъас дувай, ттуяту кIирисса ссалам буси Дагъусттаннал агьалинахь, чIарав бавцIуну тIий барчаллагьрай ушиву буси, — увкунни Расуллул.

[dropcap]В[/dropcap]анал бувсунни оьрчIнийва бакIравун бувххун бивкIшиву Нева неххал ялтту пагьламан лахъан хьурдай тIисса пикри, хьул бивхьуну, кIива зуруй хIадур хъанай ивкIшиву, дагьайкунсса репетициямур цал дакъа къадуршиву, цурдагу – неххайх микI бавкьу­сса ппур­ттуву. Бувсунни хияллай ушиву Грозный-Сити ва Москва-Сити лахъазаннугу ласун, яъни, ихтияр дулурча, ми бюхттулсса къаларду хьусса къатрал ялттугу пагьламан лахъан.
Оьвкуссия на Расуллул бу­ттайн Мухтардуйнгу. Таналгу бувсунни цалвамур дакIнивугу вас-ццахлийсса асарду бивкIшиву, амма Расул цалла лархIусса кьаст бартдигьин къистта ув­ккун ухьувкун, тренер, наставник хIисаврай, чIарав авцIушиву.

— ДакIнихтуну барчаллагьрай буру ва проект бартдигьин жунма кумаг бувсса Абакаров Рамазаннуйн (компания «Баттерфляй»), ттула ссурахъу Аьлиев Робертлуйн ва ПаччахIлугърал Думалул депутат Аьвдулмажид МахIрамовлуйн, барчаллагь­рай буру жущал ххаришиву кIидарчIуминнайн, — увкунни Мухтардул.
Щалла дунияллийх машгьур­сса цIувкIуллал пагьламантурал цIа цIунилгу цIай-цIайтIи дунни Абакаровхъал тухумрал ххюлчинмур никирай­сса пагьламан Расул Абакаровлул.

Нева неххайхсса архъандалия учIайхтува, журналистътурахьхьун интервью дуллалисса Расуллул хъазамравун чIувин увна цала чIивисса арс. Экрандалийра суратгума рирщуссия на му хIалатраву. Расуллул кIия арс ур, цаннан 4 шин дур, гаманан 3 барз бур. Ца ччай бур­хха цIанихсса цIувкIуллал пагьламантурал династиялул тарих лахъи­сса хьуну.