1-мур ЦIувкIратусса Рамазанов Аьлихан, 1935 шинал Буйнакскалий связьрал ФЗУ-гу къуртал бувну, связистну зий ивкIун ур. Морзел азбукагу кIулсса, ххуйсса связист, ва яла аьрайгу цал телефонистну зий ивкIун ур. Ванал арс Илиясгу буттал ххуллийх лавгун ур.Ванал даврил уртакьтурал Илияс куна хьхьичIунсса пишакар цама акъассар учай связьрал ва электрон техникалул аралуву. Ва зий ур Ростелекомрай, связьрал даву хьхьичIуннай дуллалисса отделданул хъунаману.
П. Рамазанова
[dropcap]Б[/dropcap]уттал шяраву 8 классгу къуртал бувну, ва дуклан увххун ур Буйнакскалийсса финансирттал ва экономикалул техникумравун. Му къуртал бувсса шинала Аьшттарханнал областьрайн аьралий къуллугъ бартбигьлан увцуну ур, кIирагу шин связьрал батальондалуву дурну дур. ОьрчIнийва электроникалул, техникалул хъирив агьсса ванан, финансистнал пишагу кьабивтун, связист хьун ччан бивкIун бур. М.А. Бонч-Бруевичлул цIанийсса связьрал электротехникалул институтравун дуклан увххун ур Ленинградрай. 1982 шинал ххуйну институтгу къуртал бувну, Дагъусттаннайн зана хьуну, ДАССР-данул связьрал управлениялий зун айивхьуну ур электросвязьрал инженерну. ХIакьинусса кьинигу шиккува зий ур, отделданий каялувшиву дуллай.
— Электроникалул даврил опыт ттул биялсса бия, оьрчIнийва машхулну ивкIра, армиялийгу даву канилух дурккуна, институтраву тIурчарив, кIулшивуртту цIакьгу, куртIгу дурссия, мунияту ттун связьрал духмур ва цIумур техникалущал зун бигьану бия, — тIий ур Илияс.
1982 шиная хIакьинусса кьининин ванан личIи-личIи кIанттурдай ва къуллугъирттай зун багьну бур: инженерну, хъунама инженерну, Самсунг станциялул хъунаману, производствалул хъунама инженерну, ОАО «Дагсвязьинформрал» вице-президентну.
[dropcap]И[/dropcap]лияслул дур связьрал аралуву яла лараймур награда – связьрал мастернал цIа. Ванал дур медаллугу, Дагъусттаннал лайкь хьусса связистнал цIагу. Гьашину ва кIийла лайкь хьуну ур Аьрасатнал ХIукуматрал чулухасса Барчаллагьрал чагъардан, ца – Аьрасатнал связьрал министрнал цIаниятусса, цагу – Аьрасатнал избиркомрал хъунаманал цIаниятусса.
Махъсса шиннардий ва ур бувчIавурттал ппурттуву агьалинал чIурду буллалисса куц ккаккан буллалисса видеонаблюдениялул проектрал хъунамагу, ЕГЭ-рду дуллалисса кIанттурдайсса тагьар ккаккан дуллалисса проектрал хъунамагу. Ва каялувшиву дуллалисса отдел зий бусса бур мукунма шяраваллил кIанттурдай ххуйсса интернет дузал даврихагу.
— 250 инсанная тIайла хьуну, 600 инсаннайн бияннинсса агьали яхъанахъисса шяраваллаву интернет сантирай ва лябуккулий зузи дувансса чаранну ляхълай буссару, сайки 600 шяравалу дагьлагьиссар жул проектрайн, ттизаманнул тIалавшиннар анаварсса бущилийсса интернет дунияллул гьарцагу мурцIний дузал дуваву,- тIий ур Илияс.
Кьиматрайминнавух, цала даврил мухIлу-хIин куртIну кIулминнавух, итххявхминнавух ур ЦIувкIратусса связист ва каялувчи, ххаллилсса кулпатраву тарбия хьусса Аьлиханхъал Илиясгу.
[dropcap]Ч[/dropcap]Iярусса орденнащал ва медаллащал аьрая зана хьусса, артиллериялул полкраву старшинану, разведчикну ивкIсса Аьлиханнул мукьагу арс, техникалул элмурдал паргалсса бушаврицIун, ас-намус бусса, къирият дусса, кувннал хIурмат кувннал буллалисса, хьхьичIун бурувгссагу бур.
