[dropcap]В[/dropcap]ай гьантрай хьунни Дагъусттаннай ОМОН «Сокол» тIисса Росгвардиялул Управление хIасул бувну 27 шин шаврин хас дурсса мероприятияртту.
Имара Саидова
[dropcap]М[/dropcap]икку гьуртту хьунни хасъсса подразделениярттал аьралитал, ветерантал ва къуллугърал бурж биттур буллай жанну дуллусса аьралитурал кулпатру, гъан-маччами.
Дайдихьу хьуна къуллугърал бурж биттур буллай ливтIусса аьскартурансса гьайкалданучIа тIутIив дишаврийну.
Управлениялул хъунама генерал-майор МахIаммад Баачиловлул барча бунни цала зузалт ва чIа увкунни миннан давриву хьхьичIуннайшивуртту.
АьФ-лул Ухссавнил Ккавкказуллал округрайсса нацгвардиялул аьралуннал хасъсса гужирдал отделданул хъунаманал хъиривчу, полковник Сергей Иноземцевлул бувккунни хьхьичIунсса зузалтран ведомствалул наградартту дуллалисса хIукму ва округрал командующий генерал-лейтенант Сергей Корнюшкиннул чулухасса барча баврил адрес.
Шадлугърай бувкIми мукунма барча бунни полковник Макка Кьурбановлул.
[dropcap]И[/dropcap]хтилатирттая махъ хьунни минутIрайсса пахъ багьаву.
Къуллугърал бурж биттур буллай жан кьурван дурсса хъунама прапорщик Камил Халиловлул арс, 39-мур школалул дуклаки оьрчI Расуллул увкунни «Офицеры» тIисса балай.
Спецназрал зузалтрал хъамаллуран ккаккан дунни уттизаманнул ярагъуннил ва бронетехникалул выставка.
Дагъусттаннай ОМОН «Сокол» хIасул бувссар 1991 шинал.
ОМОН-далул состав гьуртту хьуссар МахIачкъалаллал чIарав Як-40 самолетрал дурсса авиакатастрофалул биян бувсса зараллу бухлаган бавриву, 1991 шинал 1-мур СИЗО-лувусса ясир бувгьуми мурахас бавриву ва чIявусса цаймигу иширттаву.
МахIачкъалаллал ОМОН сакин бувния шихунмай гьуртту хьуну бур 275 контртеррорист операциялувух, 823 оператив мероприятиялий ва м.ц. Къуллугърал бурж биттур буллай оьрмулуцIа хьуну ур 76 ОМОН-далул зузала ва къучагъшиврухлу ва виричушиврухлу паччахIлугърал ведомствалул наградарттан лайкь хьуну ур 186 зузала.
