ХьхьичIвагу чивчусса куццуй, жулла республикалий тIиртIуссия «Ттул Ватан – Аьрасат» тIисса цIанилусса агитбригадарттал фестиваль. Му уттинин хьуссия Къизлардай, Ухссавнилмур территориал округрай. Фестивальданул сакиншинначитал бур ДР-лул Культуралул министерство, Республикалул Халкьуннал творчествалул къатта. Фестиваль хьунни террорданийн къаршину жулла республикалий бартдигьлагьисса программалул лагрулий ва Дагъусттаннал халкьуннал шаэр Расул ХIамзатовлун 95 шин шаврин хасну.

---

Бадрижамал Аьлиева
Уттигъанну му фестивальданул ирглийсса этапру хьунни Лаващав – Зунттал территориялул округралмур, МахIачкъалалив – Централ территориялул округ­ралмур ва Дарбантлив – Кьиблалул федерал округралмур. Фестивальданул гала-концерт тIурча, хьунни 1-мур майрал байрандалул лагрулийсса шадлугъирттавух МахIачкъалалив, Оьруснал театр­данул хьхьичIсса майданнив.
Лаващав хьумур шадлугъравух гьуртту хьунни Лакрал ва Ккуллал районнаясса творчествалул коллективру.
Фестиваль-смотр даврил агьамми мурадру бур коллективирттал дянивсса даврил опыт, кIулшиву кIидачIаву, махъа нанисса ник ватан ххирану, хъунмур никиращал дахIаву дуну тарбия шаву. Фестивальданул комиссиялул член, композитор Хан Баширов укун тIий ур ва шадлугърал хIакъираву:
— Цимурца цIумур – му хъамадиртсса духмурди. Совет заманнай агитбригадарттал дянивсса конкурсру, миннал шяраваллил захIматкашнал, фабрик-заводирттал зузалтрал хьхьичI ккаккан дуллалисса концертру дикIайссия клубрал идарар­ттал дуллалисса даврил машгьурмур журану. Агитбригадарттал гьурттучитурал машгьур буллай бикIайва захIмат, дуллан да­къулт дащуй бихьлай. Барчаллагь учин ччай ура культуралул зузалтрал даврил ва хъинсса жура цIубуккан буван дакIнийн багьминнахь. Жува, оьрмулул хъуними, хьхьичIва-хьхьичI аьр­кин­ссар мюрщиминнан ла­хьхьин буван цалла ватандалул хIур­мат буван, ми захIмат ххирану ва цаманал захIматрал кьадру буну, миллатрал вирттаврая пахру буну тарбия буллан…