Гьар шинах кунма, гьашинугу МахIачкъалаливсса, Каспийскалийсса ва цаймигу шагьрурдайсса цIувкIуллал ва тамансса лакрал Ххувшаврил байран дайдирхьуна Совет Союзрал кIийла Виричу АхIмад-Хан Султаннул гьайкалданучIа тIутIив дишаврия. Хъуннасса уттарашинна дия, чIявусса жямат бувккун бия ва ххуллухгу.
ПатIимат Рамазанова
ЦIувкIуллал Жяматрал советрал хъунама, профессор МахIаммадбаг ХIусайхановлул, байрандалул дайдихьу дуллалисса махъ лахълай, дакIнийн бувтуна ЦIувкIрату Буттал кIану буруччин 182 инсан аьрайн лавгшиву, 3-4 инсан лавгсса кулпатругу бивкIшиву, Североморскалия байбивхьуну, ЛухIи хьхьирийн бияннин, Архмур Востокрая байбивхьуну,
Берлиннайн бияннин, жаннай хIайп къакуну, цIувкIулгу талай бивкIшиву ва 94 инсан аьрая зана къавхьушиву. Бувсуна цIувкIуллал жяматрал къинттуллух фронтран буллалисса кумаграхлу Сталиннул цIаниятусса барчаллагьрал телеграммагу дуркIун диркIшиву, РК ВЛКСМ-рал секретарь Бакриев НурмахIаммадлул цIаний.
ЧIяйннал жяматрал вакил Айдаев МахIаммадлул, Ваччиял Жяматрал советрал председатель Давди Увайсовлул, журналист Гъаза Гъазаевлул, цIувкIуллал хъуначу Сулайман Аьбидовлул ва махъминналгу кIицI лавгуна АхIмад-Хан Султаннул щалвагу Дагъусттаннал цIа бюхттул дуршиву, Ххувшаврил кьимат цимирагу никирай бюхттулну бикIантIишиву.
Москавливсса дагъусттанлувтурал цIанияту жямат барча бувна Аьрасатнал лайкь хьусса аьрли летчик, полковник Рамазан Рамазановлул. Калининградрай яхъанахъисса техникалул элмурдал доктор МахIаммад Аьлихановичлул цIанияту щинал лултту дуккай лодкалиятусса барча баву дурккуна МахIаммада Рамазановлул. Жямат барча бувна аьлимчу Юнусов Кьурбаннулгу. Ванал ппу, сайки 70 шинай ятIа-тIар бакъаминнавух ивкIсса хIаписар Юнусов МахIаммад, лявкъуссар Славянск-на-Кубани тIисса шагьрулий аьмсса гьаттаву увччуну.
Профессор, академик АьвдурахIман Халиловлулгу, гьар шинах кунна, хIадур дурну дия АхIмад-Хан Султаннул суратирттащалсса хъазамрай лачIай значокру: мюрщиминнанссагу, хъуниминнанссагу. Ххувшаврил балайрду Гъазихан Рамазановлущал ва Ссупиян Оьмаровлущал архIал тIий бия мюрщисса оьрчIругу. БавтIцириннахь барчаллагь увкуна Виричунал гъанчу Сайдун ХIажикьурбановлул.
