Тталаткьини Поэзиялул театрдануву хьунни А. Къапиевлул цIанийсса Лакрал музыкалул ва драмалул театрданул сипталийну буллалисса дуклаки оьрчIал лакку мазрай дакIних шеърирду буккаврил ва балай учаврил шамилчинсса конкурс «Щаращи».

---

Зулайхат Тахакьаева
[dropcap]В[/dropcap]а ххуллухсса конкурс хас дурну дия «Дараччи» клубрал хъунмур Мариян Илиясовал аьпа­лун, цалчинсса конкурсрая шинмай ва даврил хъуннасса хъар цийнна ларсун бивкIшивугу хIисаврайн лавсун.
Муний гьуртту хьунни Лакрал шаннагу райондалиясса ва МахIачкъала, Каспийск шагьрурдаясса 70-ннийн бивсса дуклаки оьрчIру.

Жюрилуву бия цалла даву лакку мазрацIун дархIусса лавайсса даражалул пишакартал: Лакрал театрданул завлит Гулизар Султанова (жюрилул хъунмур); «Илчи» кказитрал хъунама редактор Руслан Башаев; «Дараччи» клубрал хъунмур Гульшан Хасаева; Тахо-Годил цIанийсса педагогикалул институтрал зузалт Пиразат Магьдиева ва Светлана Мутаева, Дагъусттаннал халкьуннал артистка Жинасат ДинмахIаммадова; Дагъусттаннал лайкь хьусса артист Арслан Шагьмарданов ва Дагъусттаннал халкьуннал артистка Мадина Исмяилова.

Гьурттушинна дурсса цумацагу оьрчIан сакиншинначитурал чулуха буллунни Мариян Илиясовал сипталийну итабавкьу­сса «Мюрщи щаращал щурщу» тIисса луттирду. ХьхьичIунсса кIанттурду бувгьуминнан дия спонсортурал чулухасса арцуйнусса бахшишру.

— Миллатирттал мазру ябансса хъунмур хъар, кказит-журналлая лирчуну махъ, театрдайри ду­сса. Мунийн бувну, жула даврил ца агьамсса ххуллуну жу ккак­лай буру ялун нанисса никиран ниттил мазрахсса ччаву ххишала хьун дансса давуртту. Ми­кку ялун личлай бур гьунар бу­сса оьрчIругу, — тIий бур Бадрижат МахIаммадхIажиева. — Зунма чIалачIисса куццуй, махъсса шиннардий театрданувун зун букIлай бия лакку маз бувагу къакIулсса жагьилсса актертал. Миннан маз лавхьхьусса театрданувур, завлит Гулизар Султановал, режиссер Аслан МахIаммадовлул, Уди Аьлиевал, Ларина Оьмаровал, Жинасат ДинмахIаммадовал хIарачатрацIух, вайннал дихьлахьисса дарсирдайну. Ххариссару лакрал шаннагу райондалия­сса дуклаки оьрчIал конкурсрай чялишсса гьурттушинна даврия. Барчаллагь тIий буру конкурсрайн оьрчIру тIайла буккансса хIаллихшин дузал дурсса районнал бакIчитурахь, кIулшиву дулаврил управлениярттал каялувчитурахь, лакку мазрал дарсру дихьлахьисса учительтурахь.

Конкурсрал хIасиллу хьунни укунсса:

[dropcap]Ш[/dropcap]еъри буккаврил номинациялий цалчинмур кIану бувгьунни: Атталоьмариев Ринатлул (КIундиннал школа, учительница Хуцаева Миясат), Ибрагьимова Мариджаннул (Щардал школа, учительница ХIажиева Тиг­рина); кIилчинмур кIану бувгьунни Тамазаев Сурхай-ханнал (Гьамиящиял школа, учительница Кьурбанова ПатIимат), Буттаев Мурадлул (МахIачкъала, 33-мур школа, учительница ЛухIуева Луиза); шамилчинмур кIану бувгьунни ХIажиева Ххадижатлул (ЧIурттащиял школа, учитель Кьадиров Мурсаби), Мутаев Жабраиллул (Чапаевкаллал школа, учительница ЩайхахIмадова Атта).

Балай учаврил номинациялий цалчинмур кIану бувгьунни Аьбдуллаева ПатIиматлул (Каспийск шагьрулул ГИМХО, учительница Амирова Лариса), Ибрагьимов Сабзарил (Къяннал школа, учитель МахIаммадов Багьавуттин); кIилчинмур кIану бувгьунни Чикалина Аленал (Каспийск, учительница Жамилова ХIабибат). ЦIагу, фамилиягу оьрус дусса ва душнил, марцIну лакку мазрай балай увкуну, цинявппа махIаттал бувна; Самадова Надирал (ЦIу­ссачIурттащиял школа, учительница ХIажиаьлиева Шагьун); шамилчинмур кIану бувгьунни ХIажиева ПатIиматлул ва Табиева Миланал (ТIюхчардал школа, учитель ХIусайнов ХIасан); Шабанов Данияллул (МахIачкъала, 28-мур школа, учительница МахIаммадова Мариана).
Хасъсса бахшишран лайкь хьунни МахIачкъала шагьрулул 51-мур лицей.

«Артистшиврул гьунарданухлу» дипломран лайкь хьунни:
шеъри буккаврил номинациялий – Гуйдалаев Арслан (МахIачкъала, 37-мур школа-гимназия, учительница Парамазова Умамат); Исрапилова Аьжа (КIундиннал школа, учительница Хуцаева Миясат);
балай учаврил номинациялий – Садикьова Аида (Гъумучиял школа, учитель ХIусманов Султан); Даллаева Шагьсалан (Хъусращиял школа, учительница Гаргацева ПатIимат); КьурбанмахIаммадова Диана (МахIачкъала, 50-мур школа, учительница, Аскандарова Умму-салимат);
«Бюхханну шеъри буккаврихлу» дипломран лайкь хьунни: Султанова Зайнаб (МахIачкъала шагьрулул 37-мур школа, учительница Парамазова Умамат).
Жюрилул чулухасса бахшишран лайкь хьунни СалихIова Сид­рат (Кумиял школа, учительница СалихIова Альбина).
Конкурсрал сакиншинначитал дакIнихтунусса барчаллагьрай бур чIарахбацIултрайн: «Дараччи» клубрайн; ЖахIпар Абуевлуйн (Халкьуннал Мажлисрал депутат); ХIасан Аьлиев­луйн, МахIаммад Аьлиевлуйн, Расул Кьаландаровлуйн, Мариян ХIусайновайн, Султан ЦIаххаевлуйн.