Лахъа-хъунну хьунадаркьунни 1-мур Майрал байран жула республикалул хъуншагьрулий.

Бадрижамал Аьлиева
Шадлугъру дайдирхьунни ссят 10-нний Оьруснал театрданул хьхьичIсса майданнив. ЦIакь хьу­сса аьдатрайн бувну, цал хьунни республикалул профсоюзирттал митинг. Му дайдихьлай, респуб­ликалул профсоюзирттал бакIчи Аьбдулла МахIаммадовлул кIицI лавгунни Дагъусттаннайсса зузисса инсантурал сайки 35 % ласайшиву 10 азарда къурушраяр чансса харж.

Махъру лавхъунни Хъунилсриннал советрал, СаллатIнал нитти­хъал ва цаймигу сакиншиннардал вакилтурал.
Хъирив хьунни аслийсса культуралул ва оьрчIал творчествалул «Хъуншагьрулул ттуршра сипат» цIанилусса шагьрулул фестиваль. Мукунна ДР-лул Культуралул министерствалучIасса Респуб­ликалул Халкьуннал творчествалул къатлул сакин дурсса «Аьрасат – ттул Ватанни» тIисса фестивальгу хьунни. СахIналийн бувккунни республикалул шагьрурдаясса ва районнаясса творчествалул коллективру, республикалул эстрадалул цIуртти.

Р. ХIамзатовлул цIанийсса кIичIираву ва кьини хъанахъисса шадлугъру ялагу чIяруя. Масалдаран, МахIачкъалаллал художествалул школалул сакин дурну дия пленэр ва оьрчIал дирхьусса язими суратирттал выставка. ЧIаравра МахIачкъала шагьрулул Тарихрал музейрал сакин дурну дия оьрчIал дирхьусса суратиртталмур выставка.

Поэзиялул театрданул хIаятраву МахIачкъалаллал оьрчIал филармониялул ккаккан дунни концерт. ЧIарав тIурча, шагьрулул ЦБС-лул щаллу бувну бия «Литературалул скамейка» ва тIиртIусса ссавнил лувсса библиотека.
Спорт ххирамигу хъамакъабивтун бия – миннангу щаллу бувну бия спортрал майданну, батутру.

Пагьламантуралмур усттаршиврул ясир бувминнаща бюхълай бия «Ленинград» гостиницалул чIарав республикалул пагьламантурал ккаккан буллалисса номердай тамаша буван.
Байрандалул шадлугъру къуртал хьунни дяхтта дувайсса фейерверкирттал савлугърайну.