Гьар шинах кунма, гьашинугу Ххувшаврил байрандалул кьини Москавливсса да­гъусттанлувтал ва къиримнал агь­лу бавтIунни Новодевичье хIатталлив бувччусса вирттаврал – Совет Союзрал кIийла Виричу АхIмад-Хан Султаннул ва парашютрал спортрал рекордсмен Наби Аминтаевлул гьаттардий алхIам буккин, тIутIив дишин, барчаллагьрай ми дакIнийн бичин.

---

Ва «Дагъусттан» культуралул центрданул ччянира дайдирхьусса аьдатри. Чансса бакъая Москавлив яхъанахъи­сса цIувкIулгу.
— Къиримнал агьлу махIа­тталну ва ххарину бия бусалардавун агьсса летчикнал гьаттайн чIявусса лак ва дагъусттанлувтал батIаврий, — тIий, буслай ур Да­гъусттаннал культуралул ишир­ттавух мудангу чялишну хIала уххайсса 1-мур ЦIувкIратусса ­Оьмар ГъазимахIаммадов.
Яла «Дагъусттан» культуралул центрданул жагьилтурал команда гьуртту хьунни «БивкIу бакъасса полкрал» шадлугърал акциялувухгу.

— Аьрали лаххиялувусса хIа­писартурал Бакриевхъал суратру кIунттихьсса жагьилначIан гъан хьуссияв, му Къяниятусса Бакриевхъая ухьунссар тIийча, ЦIувкIратусса Бакриевхъал тухумраясса лявкъунни, дакI ххаришиврул дурцIунни, акциялий дагъусттаннал фамилияр­ттащалсса суратру чIалай. Цинявннащал кIул хьунсса сант къадагьунни,амма дяъви къуртал хьуну 73 шин ларгун мукьахгума буттахъал цIардал жу­ва парадирттайгу дус буллай, гъан буллай буру, — тIий бур ЧукIнатусса Аьвдулкьадирдул душ БатIи Оьмарова.

П. Рамазанова