[dropcap]Б[/dropcap]уттал кIанттул цIанийсса дяъвилий Ххувшаву ларсун 73 шин шаврин хасну МахIачкъалаллал 11-мур гимназиялий хьунни шагьрулул школарттаясса «Мюрщи аьралитурал» парад.
Андриана Аьбдуллаева
Гимназиялул хIаятраву бавтIун бия аьралуннал яннардавусса чIюлусса дуклаки оьрчIру. Парадрай гьуртту хьун бувкIун бия Дагъусттаннал Ветерантурал советрал председатель МахIарам Аьлиджанов, Интербригадалул штабрал хъунама Арсен Абилаев, Рескомрал вакил Александра Хорошевская, Аьрали къуллугърал ва аьрали иширттал ветеран, гвардиялул хъунама прапорщик Юсуп Юсупов, Связьрал роталул старшина, хъунама прапорщик Владимир Горобец.
Дачин дурну ия парад «Вийнни Ватандалул вихшала» тIисса клубрал председатель, полковник АхIмад Юсупов. Ванал бувсунни дуклаки оьрчIахь Буттал кIанттул цIанийсса Хъунмасса дяъвилий дагъусттанлувтурал ккаккан дурсса къучагъшивурттая, КIийла Совет Союзрал Виричу хьусса АхIмад-Хан Султаннуя, Совет Союзрал Вирттал МахIаммад ХIажиевлуя, Якьув Сулаймановлуя, Валентин Эмировлуя, Италиянал Виричу ХIусайн Камаловлуя, Палангнал Виричу ХIусайн Кущаевлуя.
Ихтилатру къуртал хьуну махъ дяъвилий жанну дуллуминнал аьпалун минутIрайсса пахъ багьаву дуруна. Парадрал лагрулий хьунни строевой балайлул конкурс. МахIачкъалаллал №11, №13 гимназиярттал, №18, №50, №32, №15 школарттал, №30 лицейрал ва 1-мур кадетътурал корпусрал дуклаки оьрчIал ккаккан дунни цалла-цалла хIадуршинна, рапорт булаврил ва маршрай лагаврил усттаршиву, ччясса чIумул мутталий автомат батIин кIулшиву. Дуклаки оьрчIал мукунма увкунни Ватандалухасса балайрду. Кадетътурал ккаккан дунни каруннай бияврил увинтру.
Ахирданий, жюрилул хIасиллу дурну, хьхьичIунсса кIанттурду бувгьусса оьрчIан дуллунни грамотартту ва бахшишру.
