Аьлибутта Аьлибуттаев,
ш. Ккацран
Халкьуннан ккаклакимур
Хъуни тамахIрал лякьрал заллухъру,
Хъуншиврух луглагими,
Цанналу дукай цухьри
Лапва къаних бувккунни.
Чил оьттуй ттаркI ганз дувай,
Мачча-гъан хъамабитай.
Халкьуннан ккаклакимур
Ккалли ссанчIав къабувай.
Вайнна тти ппухълу литIлай,
ОьрчIру ятинтал хъанай,
Ялгъузсса кулпатирттай
Загълунтал зулму буллай.
МурчIи хьуну бур агьлу,
Дус, душман ххал къахъанай.
Ххявххун, бувккун бур хьхьичIун
Утти къаркIулт, къачагътал.
1992 ш.
Зунттай ттуруллив
Агь, зунттай ттуруллив, ссавнил чарваннув,
Ттул дакIнил аривгу ликказан дайсса,
Зу кIучI бару зунттай кIай ссулилт, барххулт,
Бизантту бувцIусса кIай оьрчIи тIутIив.
Гьаз хьира зунттая, лахъи къалаглай,
Ттулгу ччаврил ххуллий гьантта къаличIлай.
Агь, ритира ттул дакI зунттайх ччамар бан,
Насира, цIимилул рахIматрайн дуклай.
Зул ясир буххурав кIай жул барзунттив,
Жул мякьсса янила лабитлатисса.
Дитиракьай аьчну арцул дагьантту,
Ппухълуннал суратру цаву чIалайсса.
1992 ш.
ЦIувкIул
Тталлуяту тталлуйн алхъан дархIуну,
Пагьламан ххал хьувкун лахънийн гьаз хьуну,
Тамаша бан лайкьри зунттал барзунгу,
Лелуххант бурхха тIий ЦIувкIуллал арсру.
Ттун душругу ккавкссар, лачинт кунмасса,
Ссурулух бигьайсса, щяв къалаяйсса.
ЦIувкIуллал ссурухIинт, ссавнин маччасса
Гьаваллаву хьхьуттай тIуркIу тIутIисса.
АхIмад-Хан Султангу нахIакьдан акъар,
Ссавруннал паччахIну цал цIа рирщусса,
Чаннаннил хъаттирдай ссурулух лехлай,
Душмантал ххит бувну, Ватан ядурсса.
Зул гьунардай мяшри щалла дуниял
Щилли къабувайсса, агь, зуй тамаша.
Ххяххабургъил тIинттай тIитIлатIи бувну,
Зуйнсса ца ссаламри ва ттул балайгу!
ХIакьссар жула вирттал
Лахъссар жула вирттал, хIакьссар чувшиву,
Лахъссар зунттурдаяр миннал гьунарду.
Ппухълунная бивзсса лайкьсса арсваврал
Гъалгъа тIутIи дурссар ссавнил лахъшиву.
Ппухълуннал рирщусса турлил паранну
Пар-пар тIийнна дуссар ссавнил цIурттаву.
Иш багьарча, ттигу аслан арсваврал
Ппухълуннал аманат ябувантIиссар.
Ссавний кIутIу тIисса цIурттал майданну
Ттигу вичIилийссар лакрал вирттаврах.
Ппухълуннал ирсирайн ура на вихну,
Ура дакI дарцIуну чувтал бушиврий.
Лаккуя нанисса чувшиврул балай
ГюргутIи бантIиссар жула наслулул.
КIай зурул дагьантту лагьний кьаритлай,
Лахъний чIалантIиссар вирттаврал цIарду.
ПасихIри ттул ниттил маз
ЦIу-хъахъисса ххяххабаргъ
Хъяй, пиш-пиш тIий бур тIутIахь,
Щюлли интнил щюлли аргъ
Дуну тIий тIабиаьтрахь.
ЛяличIину яргсса дур
Буттал улклул лишанну,
Ми ккаккан дан авкьатри
Ттул ниттил мазрал каши.
1985 ш.
Бухлаглай бурав?
Агь, яруннал чаний,
Чан хьусса цанна?
Ча бувккун, чун бивра,
Ттун буллу оьрмуй?
Дакъар вийн вих хьун ччай
Хханххираву дакI:
Ккаклайрив нанисса
Ттун кутIасса макI.
Ирглий буллу гьантта
Бухлаглай бурвав,
Кьинирду ссятурдийн
Тти дуклай дурвав.
Ажал хъяврин буван
ЩищачIав къашай,
Къачча-ччай бухлагай
Инсаннал мажал.
Аммарив оьрмулух
Мякь хьхьара къашай.
Оьрму лаглайнугу,
Умуд чан къашай.
Яхьира ттухлугу,
Шеърирдал тIутIив,
Асардал марцIшиврий
Чирахъру лахълай.
1994 ш.
Бяйкьунни арши
Гьарцаннал цала чулийн
Щинаххуллу бувккунни,
Буллугъсса ватандалийн
Къарциншиву дагьунни.
Дагьаймур, къадагьаймур
Хъап-шаплий кIункIу дунни.
ПаччахIлугъран хъанаймур
ЩилчIав хIисав къабунни.
ХъатIри ялун багьувкун,
Ци личIайссар кьаркьалттуй,
Кьурщу дунни, дуркунни
Духкъалагай хIукумат.
1992 ш.
Якьамасса макьанну
Буллугъсса ссутнил рангру
ЦIарал ламарайн дуклай,
Ччучлай дур лухччи-хъуру,
Чарххана тIайла буклай.
Ччучлай дур тти ттул дакIгу
Ссутнил хъахъи цIараву,
Щарайгу бур асарду,
Дардирдал гьалак бувну.
Хъунисса бур вил угьру,
Лахъисса дур вил хIасрат,
Хъин къашайсса щавурду
ЦIу лаглай дур дакIниву.
Агь, ссут тти вил ххуйшиву
ЛухIи ларххун чIалай дур,
Буллугъ ссупралул ялун
Ялгъузшиву дагьну дур.
Чув бур тти вил балайрду,
Ватан гюргутIи дайсса?
Чув дур тти вил макьанну,
ХъатIал гур дуллалисса?
1991 ш.
Каманча
Баллай бур, каманчай, вил якьама чIу
Зунттал дянив лирчIсса буттал шярава:
Леркьуну ларг магъал тталлал лувату,
Зивзуну лавг чIирттал гьанурдалату.
ВичIилий бур вацIри вил аьтIи чIуних,
Макь рутIлай дур тIутIив, марцI хьхьемал цIай тIий.
Зума тIий дур ратIру хьхьугу-кьинигу,
АьтIий бур, экьинай, бявкъу щаращив.
Ина кьабивтссияв, мюрайх лавххуну,
Вил язисса балай бяличIан бувну.
Баллай бур жун даин арнил кIанттайнгу,
Жуйн оьвтIий, жул хъирив вил аьсив чIурду.
Тти аьтIийнма личIу жул тарихраву,
Муруллаву ливчIсса чIиви оьрчI кунма.
Жуща къавхьуннича гъурбатраяту
Зана хьун вил чIунийн, вил балайлучIан.
