Хъуннасса уттарашинна дия Ххувшаврил байрандалул хьхьичI кьини КIундиннал шяраву. ЯтIа-тIар бакъа акъа хьуну ивкIсса ХIажиев Сагидбатталлул ттаркIру Севастополлая ватандалийн ларсун, шяраваллил хIатталлив дуччин бувкIун бия шагьрурдай ялапар хъанахъисса щарнил агьлу.
Ва иширан хас дурсса митинг хьунни аьрая зана къавхьуминнансса гьайкалданучIа. Шяраваллил бакIчи Жабир Гаммуевлул бувсунни КIундияту ватан дуруччин лавгун ивкIсса 264 чиваркIуннава зана къавхьуну бушиву бачIиннуяр ххисса.

---

Зулайхат Тахакьаева
ХIажиевхъал кулпатрава лавгун ивкIун ур кIия уссу – Аьвдуллагь ва Сагидбаттал. Аьрая зана хьуну, уссиясса хавар баяннин ялугьлайна дунияллия лавгун ур Аьвдуллагь. Ванал арснал МахIаммадлул шяраваллил хIатталлив дацIан дурну дур бу­ттауссин цIа кусса гьайкал.

Райондалул бакIчи Юсуп МахIаммадовлул кIицI лавгуна райондалия ватан дуручлан лавгсса ряхазарунная зана къавхьусса шаназарунниха ливчусса чиваркIуннал дянив так Сагидбатталлун нясивну лявкъуну бушиву буттал ватандалийн рухI зана дикIан.

Севастополлайсса Дагъус­ттаннал диаспоралул вакил Мурад СалихIовлул бувсуна, 73 шин гьарчагу, махъа-махъсса солдат лякъинцIа луглай душиву хъиривбизулул кьюкьри, ца солдатнал ттаркIру дурччусса кIанттай миннан ляркъуну диркIшиву медальон, КIундиннал шяравату­сса ХIажиев Сагидбаттал тIисса цIа чирчусса.

— Му иширая ттунма баяйхту, на оьвкуссия райондалул бакIчинайн. Юсуп Ма­хIаммадовлул ччясса му­тталий Сагидбатталлул гъан-маччами лявкъунни. Уссил арснал арсру Аьбдул, МахIаммад ва ХIанипа бувкIун тихун, ми гьуртту хьу­ссар уттинин ятIа-тIар бакъа акъа хьуну ивкIсса 107 солдат уссурвалсса гьаттаву бучлачисса иширай. Вайннан ччан бивкIунни цала буттал бутта­уссил ттаркIру ватандалийн ласун. Вайннащал дуркIссар Сагидбатталлул медальон, партийный билет, тIакьа ва ттупанчалул касак. Лахъа-хъунну тIайла бувкссар вай тиха, — увкуна ванал.

Ихтилатру бувна Сагидба­тталлул шяравучу Аьбдул Шихлаевлул, уссил душнил Па­тIиматлул, райондалул Хъунис­риннал советрал хъунама Даниял Магьдиевлул. Дуклаки оьрчIал дурккуна назмурду.
Сагидбатталлул ттаркIру дир­хьусса къурши ванал уссил къатравунгу лавсун, кIичча лавгуна хIатталлив аьдат-эбадатрай дуччин.