[dropcap]М[/dropcap]ай зурул 16-нний ЦIуминалийсса ТIюхчардал 1-мур школалий хьунни 1999 шиналсса дяъвилул иширттаву къучагъну жан дуллусса полициялул лейтенант Давдиев АхIмад КьурбанмахIаммадлул арс дакIнийн утлатисса мажлис.

[dropcap]В[/dropcap]анил сиптачиталну ва сакиншинначиталну хьунни «Аьра­сатнал нинухъру» тIисса региондалул отделениялул председатель, Каспийскаллал СаллатIнал ниттихъал комитетрал председатель Таиса МахIаммадова, ТIюхчардал школалул учительтурал коллектив, виричунал уссу Сайпуттин Давдиев.

Школданул залданул сахI­налий дия 1999 шинал жанну дуллусса милицалтрал суратир­ттал стенд. ЛичIину бия АхIмад Давдиевлун хас бувсса мурцIу. Экрандалия ккаккан буллай бия та дяъвилул лахIзарду.
Таиса МахIаммадовал мажлис тIивтIуну махъ АхIмадлул оьрмулия ва мунал къучагъшиврия бусласисса ихтилатру бунни ТIюхчардал школалул директор ШайхахIмад Дадаевлул, Каспийск шагьрулул библиотекарттал системалул директор Мадина Тимировал, Каспийск шагьрулул улча лахьхьаврил музейрал директор Нажмуттин ХIажикьурбановлул, Авгъан дяъвилул гьурттучи Вагиф ХIусайхановлул.
КьурбанмахIаммадлул арс АхIмад Давдиев увну ур ТIюх­чардал шяраву чIявусса оьрчIру бусса кулпатраву. Ппугу ччяни дунияллия лавгун, оьрчIру хъуни буллан, багьну бур ниттин Бажин.

1985 шинал ТIюхчардал школагу къуртал бувну, АхIмад ув­ххун ур Дагъусттаннал политех институтравун. 1997 шиная айивхьуну, зий ивкIун ур ЦIуссалакрал райондалул виваллил иширттал отделданий. 1999 шинал сентябрь зуруй Да­гъусттаннал аьрщарайн 400-нния ливчусса ярагъуннил балгусса террористал ххявхсса чIумал, буттал улча буручлай, къучагътурал кунна, жанну дуллусса ЦIуссалакрал милицалтравасса ца хъанай ур АхIмад Давдиевгу.
Та, 5-мур сентябрьданул, кьини кIюрххил АхIмад цайми милицалтращал ТIюхчардал блокпострай ивкIун ур. Шяравалу террористурал вив ларсун диркIун дур. ЧIирисса милицалтрал кьюкьлун 3 азарунния ливчусса боевиктуращал унгу-унгу талан багьну бур. Шяраваллил ялувмур махIлалия биту-ххитулул чIурду баллан бикIайхту, АхIмад кIийн левчуну ур. Ванан данди ацIан багьну бур 100-хъул боевикнайн.
— Ина бусурман ура, канийн учIарча, жу ина итанну, — тIий бивкIун бур къачагътал.

— ХIаписартал канийн къа­бучIайссар, — кьянкьану жаваб дуллуну дур АхIмадлул.
Ванал кьатI увссар 5-6 боевик, цувагу душманнал ккуллардал увт­ссар. АхIмад Давдиевлул, ярагъ канища хIура къабувну, жан дуллуссар. Ванан диркIссар 31 шин.
Ванал чувшиврун хIуку­мат­­ралгу кьимат бивщуссар, АхI­мад Давдиевлун аьпалул хьуну махъ Къучагъшиврул орден дуллуссар. Ванал цIа дирзссар ТIюхчардал шяравусса яла хъунмур кIичIираваллин.
Вай гьантрай ЦIуссалакрал райондалул бакIчи ХIажи Ай­­диевлул хIукму бунни ЦIу­миналийсса ТIюхчардал №1 школалунгу Давдиевлул цIа дулун.
Май зурул 11-нний АхIмад Давдиевлун 50 шин хьунтIиссия. ХIайп, аргъираву бяливчIунни мунал оьрму.