Хъусращиял шяравасса Ванатиева Аминатлун (ва Ккуллал райондалий кIулну бур Аня тIисса цIанилу) чIавану бунува кIулну бивкIун бур цила дугьансса касму цумурдив. Аминат бур Ккуллал райондалий хъинну бусравну ивкIсса милица Кьурбаннул ва Шагьуннул душ.
ХIажимурад ХIусайнов
Школа ванил къуртал бувну бур ЧIяйннал шяраву. 1969-ку шинал школа къуртал байхтува, лавгун бур Буйнакскаллал медучилищалувун буххан. Му къуртал байхту, 1972-ку шинал, ва зун тIайла бувккун бур ЧIяйннал шяравусса азарханалийн. Амма ташулул хьуну махъ ласнащал лавгун бур Липецкаллал шагьрулийн.
Тиха зана хьуну бур шаппайн 15 шинава. БучIайхту, зунгу бувххун бур цила дакIнин ччисса даврийн – райондалул азарханалул хирургиялул отделениялул медсестра-анестезистну. Ва даврий зуншиврул ванил бувккуну бур шанма зуруйсса курсругу. ЦIана Аминат зий бур амбулаториялул медсестрану. Ва бур лахъмур категориялул зузала. Цилламур даву дакъассагу, азарханалул хъунама хIакин Сулайман Сулаймановлул ванийн тапшур дурну дур санитариялулмур давугу.
— Ттун чIивину бунува дакIнил лавсуна ттула оьрму хас буван инсантурал цIуллушиву дуруччаврин. Ххишалдаран, ттул нину зий дикIайва ЧIяйннал шяравусса азарханалий, марцIшиву дуручлай. На ганин кумаг бангу лагайссияв. Ваччав хирургиялул отделениялий зузисса чIумал на чIявусса инсантал ххассал бувссар. Утти ттуйн тапшур дурну дур жяматрахь цIуцIавурттая бусайсса, гайннуя цукун буруччин аьркинссарив бувчIин буллалисса давугу.
Цила даву биттур даву дакъассагу, Аминат бур мукунма гьарта-гьарзану коллективрал давурттавухгу гьуртту шайсса инсан. Ванил учай ххуйну балайгу, гьуртту шай медсестрахъал дянивсса конкурсирттавух. Ванин цимилагу баян бувну бур хъунама хIакиннал барчаллагьру, дуллуну дур Дагъусттаннал ЦIуллу-сагъшиву дуруччаврил министерствалул ва Аьрасатнал профсоюзрал чулухасса грамотартту, арцуйнусса бахшишру. ХIасил, Аминатлул Ккуллал райондалул жяматрал цIуллушиву дуруччаврил даврий дуллалимур янила дуккан къадиртун дур.
Аминатлул душ Назира цила кулпатращал яхъанай бур Украиннаву, школалий ингилис мазрал дарс дихьлай. Арснал Шамиллул къуртал бувну бур Ростовуллал юрист институт. Аминат вай тIайласса ххуллийн буккан буван цищава шаврия ххарину бур.
Дурусну апрельданул 7-нний Дунияллул цIуллушиврул кьини бувнугу бур Ванатиева Аминат. Жувагу чIа учинну ванин циламур оьрмулувугу цIуллушиву ва оьрчIая ккаклакисса чани.
