[dropcap]Т[/dropcap]а дяъвилул щавурду цIа­нагу цIалайнна дур. Ца ГьунчIукьатIрал шяравату дяъвилий гьуртту хьуну ур 264 инсан. Миннаяту ттуршлийсса ливтIуну бур.

Амин Аьбдуллаев
Ба-бакI ГьунчIукьатIрал чи­варкIуннал цIарду пикрирдал дуллан къахьунссар. Та оьсса дяъвилуву Дагъусттаннал миллатирттава ляличIиссара къия лакрайн дирну дур. Циван учирчан, жула сайки цинявппа арамтал учетрай бивкIссар военкоматрай. Миннах вацIравух, нуххавух луглан багьлай къабив­кIссар.
Майрал 9-мур кьини жулла ца яла хъуннамур байран хъанай дур. ЧIярусса шинну ларгунни Ххувшаву ларсун, дяъви къуртал хьуну. Жула хIукуматрал бакI дургьумигу чIявусса хьунни.

Амма Сталин ивкIуния шихуннай жулла хIукуматрал ахIвал, личIи-личIисса экспериментру буллай, ялу-ялун хьхьара хъанай, ахиргу архIалла лирну, сайки никирттайн дагьавайсса кIанттайн дируна. Ттухь цIуххавай, жула хъунмасса талихI хьунни къуртал шавайсса паччахIлугърал бакI дугьанману Владимир Путин тIайла ацIаву.

1954 шинал ттущал архIал армиялий къуллугъ буллай буссия Гъазаев Гъаза, Кушаев Макьсуд, Мусалаев Мустапа, ХIажиев ХIажи, Бугъанов Загьиди, Бугъуннаев Мустапа, ХIусайнов Сагид-Аьли. Та чIумал жу хъа бувссияв махъва-махъсса оьттул кIунтI Ватандалун булун. Жу цаягу му хъалийн хаингу къавхьуссару, чIявусса цайми кунмасса чиндаххулт бакъану тIий. Жул дустал аьпалухьхьун лавгунни, ливчIунну Гъазагу, нагу.

ЧIалачIисса зат бур, цайми-цайми паччахIлугъирттах бурувгун, жула агьалинал ахIвал ялавайсса бур. Мунин сававгу хьхьичIа-хьхьичI В. В. Путин акъар, мунин савав му учIаннин хъинну хьхьичIра хIасул хъанай диркIсса тагьарди. ХIукумат хъямала дуллай бивкIсса цуркинтри, коррупционерталли.
Ттуна чIалачIиссаксса, Путин ур ххишала акъа паччахIлугърай дакI цIуцIисса, жула хIукуматрал ахIвал чIирисса чIумул мутталий цIакьгу бувну, импер зумуну­сса гьужумру буллалиминнахьхьун жаваб дулун бюхъайсса бакIчи. Ва, цайми-цайми куна, ххаралунсса «болтунбекшиву» дуллай акъарча, аькьлу буну паччахIлугъгу дургьуну, дунияллущалгу сивсуну гъалгъа тIий ур.

Уттигъанну ца ур жула Да­гъусттаннал телевидениялий гъалгъа тIий, 18 шинал мутталий Путиннул хIукуматран ци хъиншиву дурссар тIий. На мукIруну ура муна мукун тIутIима ушиврий щюлли чагъардах цала ватангу, яхIгу баххан махъаллил къахьунсса инсан.

МахIачкъалаллал ца колледжрал студентътурахь ихтилат буллалисса кIанттай на увку­ссия: «Зува инсантал кунма ялапар хъанан ччай бухьурча, зу зула чIурду В. В. Путиннухлу булара», — куну. Тани Путин уссия анжагъ премьерну. Тания шинай му адаминал, щийнчIав чIугу лахъ къабувну, гьарцагу жула хIукуматрай хIап тIисса кьацIурдихьхьун багьайсса жавабгу дуллай, никир­ттайн дагьнура диркIсса хъуннасса паччахIлугъ ччаннай дацIан дурунни, гьаз дурунни лахъсса шачIанттуйн.
На хъинну рязира В. В. Путин цIунилгу Президент шаврий. Жунма захIматну бур, жува цинявппагу, мунал лагма лавгун, мунацIун кабакьлан аьркинссару.

На ура 84 шинавусса угьара адамина, на ттула пикрирдай акъара, на ура хъирив нани­сса жагьилминнал буруккинттарай, на ура жула оьрчIал ялун бучIантIимунил дардирдай.