[dropcap]А[/dropcap]ьрасатнал АПК-лул хIурматлувсса зузала Шарип Шариповлущалсса хьунабакьав
Майрал 22-нний Миллатирттал библиотекалуву «Пишакар» тIисса цIанилусса цIусса проект щурун диркIунни. Ванил мяъна-мураднугу бур республикалул маэшатралличIи-личIисса арардаву ца яла хьхьичIунминнан ккаллийсса, эбратран буцин лайкьсса инсантуращал, пишакартуращал жула жагьилтал кIул баву, миннал дянивалу зузи даву.
Залму АьбдурахIманова
[dropcap]В[/dropcap]а цIусса проектрал цалчинма хъамаличу хIисаврайгу оьвкуну бия жуна чIявучин кIулсса, экономикалул элмурдал доктор, ДР-лул лайкь хьусса экономист, 2013-2015 шиннардий ДР-лул вице-премьерну зий ивкIсса ва цIана «ЮгАгрохолдинг» тIисса хъуннасса инвестпроектрал каялувчину зузисса, Исмяиллул арс Шарип Шариповлуйн.
Увну ур Ш.И. Шарипов ЦIуссалакрал райондалийсса Чапаевкаллал шяраву. МарцIсса ххювардай школагу къуртал бувну, дуклан увххун ур Тамбовскаллал областьрайсса Чакиннул цIанийсса шяраваллил хозяйствалул техникумравун. ЯтIул дипломращал къуртал бувну бур К.И.Тимирязевлул цIанийсса Москавуллал шяраваллил хозяйствалул академия ва хъирив – Ростовуллал паччахIлугърал экономикалул университет. ЗахIматрал ххуллу байбивхьуну бур Тамбовскаллал областьрайсса «Волна революции» тIисса колхозраву бригадирнал къуллугърая. 1991-1993 шиннардий, стажировкалий тIайла увккун, зий ивкIун ур Американаву.
1993 шинал Дагъусттаннайн зана хьуну, республикалул Шяраваллил хозяйствалул министерствалийн зун увкIун ур. ХIакьинусса кьининин ва аралуву ца яла хьхьичIунминнавухсса ва ца яла за кIулсса пишакарнан хIисавнугу ур.
ЩапI куну бувцIусса библиотекалул конференц-залданувун ва кьини бавтIун бия Шарип Шариповлул даврил уртакьтал, дус-ихтивартал, республикалул цаппара министерстварттал ва ведомстварттал жагьилсса пишакартал, личIи-личIисса шиннардий Дагъусттаннал шяраваллил хозяйствалуха зий, захIмат буллай бивкIсса хIурматлувсса инсантал ва мукунма ДагГАУ-лул ва ДГУНХ-рал студентътал ва преподавательтал.
Сайки кIира ссятрай ва ххишалагу лахъи ларгсса хьунабакьавугу хьуна хъинну яргсса ва дакIний личIансса насихIатру, мюнпатсса ихтилатру буллалисса.
— Ттула оьрмулул гьарцагу шачIану ттунма ххан бикIай нава ттула ниттил цIаний бувсса. Ппугу ччяни яла лавгун, ттул ниттил жу ччаннай бацIан бан хъунмасса захIмат бивхьуссар. Нину ттуяра рязи даншивруцIун, ганил дакI ххари даншивруцIун бавхIусса бикIайва ттулмур хиялгу.
Жула гьарнал оьрмулуву бикIан аьркинссар, зунгу мукунма маслихIат буллай ура, мукун ишан ласун багьлагьисса, миннал жунма ххирашиврул цIаний жува хIарачат буллан кунма чIалачIисса инсантал. Ттунгу, чув-ухьурчагу, ттулламур нину оьрмулул ттарцIну чIалан дикIайва,- тIий ия Шарип цала аьчухсса ихтилатраву.
Республикалул АПК-лул тагьардания буслай, Шариплул кIицI лавгуна шяраваллил хозяйствалул ара хIакьину хъинну мюхтажну душиву за кIулсса, итххявхсса пишакартурах, цIусса техникалух, хозяйствартту щурущи дувансса инвестпроектирттах.
Цала даврил уртакьнаясса, ванал даврихсса гъирараясса ихтилатру мукунма бувуна шяраваллил хозяйствалул ветеран-хъуначу Шарапуттин Инигововлул, «Дагагроснаб» идаралул каялувчи Чамсуттин Мутуевлул, географиялул элмурдал доктор Шагьимардан Мудуевлул, вузирдал муаьллимтурал ва студентътурал.
Хьунабакьаврил ахирданийгу студентътурал Шариплухьхьун цала язи дургьусса шяраваллил хозяйствалул аралуцIун бавхIусса суаллу буллуна. Суаллу бия личIи-личIисса: лахъсса даражалул къуллугърайсса пишакар хьуншиврул ссаха зун аьркинссар, ялунбучIантIимуниву цуку-цукунми пишарду, сянатру сийлий дикIантIиссар, республикалул АПК ччаннай дацIан даншиврул ци чаранну ляхълан аьркинссар тIисса. Бия суаллу цIана ва цува зузисса «ЮгАгроходинг» инвестпроектрайн багьайссагу.
Хьунабакьавугу къуртал хьуна цинявннал цачIусса суратру рищаврийну.
