Дамаданнул душ КъутIаева Ххадижат
Апрель зурул ахирданий оьрмулул 86 шинаву дунияллия лавгунни хъинну ас-ламус лавайсса, щалла Ккуллал райондалул жяматраву бусраврай оьрму бувтсса Ваччатусса Дамаданнул душ КъутIаева Ххадижат.
1951-ку шинал Дагъусттаннал пединститутгу къуртал бувну, Ххадижат тIайла бувккун бия СумбатIуллал школалий оьрус мазрал ва литературалул дарсру дихьлан. Муния махъ 1960-ку шинал, РайОНО-рал хIукмулийн бувну, Ваччиял школалий дарсру дихьлай буссия 1990-ку шинайн бияннин, пенсиялийн букканнин.
Ххадижатлул хIалал дурну, лайкь хьуну бия «Дагъусттаннал лайкь хьусса учитель», «Просвещениялул отличник» тIисса цIардан ва чIярусса бахшиширттан. Ххирая Ххадижатлул учениктирттан, Ккуллал райондалия бикIу, Дахадаевуллал, Ахъушиял районная бикIу, Ваччав бувкIни, ваничIан хIурматрай букъавххун ялавай къалагайва. Ва жяматрал гьарца багьу-бизалуву, бивкIу-буккулий, мискинма-аваданма къакуну, хIурматрай цинявннал чIарав бацIайва.
Ххадижат ахиратравун лавгсса кьурчIишиву кIидачIлай буру ванил арснахь, душварахь, махъсса цинявппагу гъан-маччанахь.
РухIиран алжан нясив баннав, гьав нурданул дуцIиннав.
Ваччиял ва щалагу Ккуллал райондалул жямат
Нариманнул арс СалихIов Зураб
Вай гьантрай Ккурккуллал шяраву хъуннасса дягъу дия. Оьрмулул аргъираву хар-хавар бакъасса бивкIулул жуятува личIи унни уздансса нитти-буттал арс СалихIов Зураб.
Зураб увну ур 1970 шинал май зурул 15-нний Ккурккуллал шяраву. Ванал нину-ппу Нариман ва ХIалимат хIал бавкьусса, жяматран бусравсса инсантал буссия, ччяни дунияллия лавгуна. Зурабгу, цала нину-ппу куна, дакI хъинсса, ка тIиртIусса, аьчухсса жагьил ия. Ва ххирая чIивинангу, хъунанангу. Цувагу хъунанал хIурмат бан кIулсса, чIивинахь цIани бан кIулсса ия. Ия ас-намус бусса, мяърипатрал увччусса. Ванал бивкIу хъинну къащи хьунни Зураб кIулсса цинявннан. Ва тачIав хъамакъаитантIиссар жяматран, дустуран, гъан-маччанан. Хъуннасса кьурчIишивугу кIидачIлай, жижара буллай буру ванал ссихь Жамилахь, цинявппа гъан-маччанахь. Цал рухI алжаннул ххари даннав, гьав нурданул дуцIиннав, ванан къабуллусса оьрму махъминнан булуннав.
Ккурккуллал жямат
Ххирасса ХIамзатлул аьпалун
Хъун бакъасса хIаллай къашавайгу ивкIун, жуяту личIи хьунни АхIмадихъал МахIаммадаьлил арс Аьлиев ХIамзат.
ХIамзат увну ур ЧIяйннал шяраву МахIаммадаьлил ва ПатIиматлул кулпатраву 1947-кусса шинал.
ЧIяйннал дянивмур даражалул школагу бувккуну, ХIамзат увхссар Москавлив Тимирязевлул цIанийсса академиялувун. Га къуртал бувкун, зун тIайла увккун ур Карелиянавун. ХIамзатлун тиккува, бусравсса къуллугъралгу хьуну, миналулгу хьун багьссар. Кулпатгу тихавасса нясив бувну, тихва оьрму лавгссия. Мунал ца арс ва кIива душ бур, кулпат ва оьрчI-душру бусравсса къуллугъирттай зий бур.
Вил бунагьирттал аьпа баннав, жул аьзисса ХIамзат. Гьав нурданул дуцIиннав, рухI чириний дишиннав.
Арс, душру,
уссурвал, ссурвал
Ттул ниттилгу гъан дурссар Ххувшаврил кьини
[dropcap]В[/dropcap]ай гьантрай мукьцIал лахълахъиссар ттул нину, КIямашрал шяраватусса Аьбдуллаева ПатIима Аминнул душ, аьпалувух бивхьуну.
ПатIима бувссар 1925 шинал ссуттихунмай хъузала Аминнул ва Залмул кулпатраву, тай хъу-лухччинуя маэшат буллалисса, колхоз-совхозру дакъасса шиннардий. ХьхьичIва школданийн занай, аьжам лахьлай бикIайсса бивкIун бур 4-мур классравун бияннин, яла оьрус алфавитрайн кIура бавукун, хъу-лухччинулсса буван ка хъирив къалаллалисса нитти-буттал, школа кьабитан бувну, хъунил давурттаха зузи бувну бивкIун бур.
Дяъвилул шиннардий ПатIима, 16 шин хьусса душ, захIматрал фронтрайн тIайла бувккун бур каналлу дуклан, аьрщарал давриха зун, мичча зана хьуну махъ – чавахъирттал батагъалийн.
Ниттил цилва дакIнийн бичавурттава:
— Жу, циняв миллатирттал инсантал, ца чулух арамтал, ца чулух хъами, жула бузлущал ца хъунмасса кказармалувун бавкьунав. Жущалла ларсъсса баркьутрал ххячарттай, лув-ялун жулла лаххиягу дирчуну, уттубишайссияв. Цукун-бунугу бакI буккайссияв ккашияту. Авлахъирттай аьрщаравусса чимус бувккун, шавхьун, букайссия. Ккашил къиялул бургъил шашан дурсса затру канай, чIявусса инсантал хьхьувайния кIюрххилнин ливтIунугу бикIайва кказармалуву, аьраварттайн бивчуну, лавсун лагайва. Аьрщарал даву, гьай-гьай, захIматсса дия.
Мичча зана хьуну махъ на гьан бувунав батагъалийн. ЦIугу бивчуну, чавахъирттал бувцIусса кьаллу хIадур байссия аьрайн тIайла буккан. Хьхьурай къери дуртун кьаритайва арамтурал. КIюрххил жу гайннащал лагайссияв кIункIу дан, балугъру хъунисса тачкардай цехирдавун буххин, сортру личIи буван. Гичча бувкIун махъ, зий бикIайссияв колхозрал давурттай, къутаннайн гьан бувнав бакIлахъия лакьин, яла ацIнияхъайсса шинну дурссар дояркану фермалийгу. Жангу диркIун дур, зийгу бикIайссияв, жущава шаймур буллай, ххувшаву ларсун арамтал бучIаннин. Ттула ниттил, Залмул, дайдирхьуну, дулайва ттухьхьун ппалул жуларду, дуллалу куну, диялсса жулардугу дурссар аьрайн посылкарду тIайла дуккан. Ми жуларду дансса ххаллугу исвагьину цилла къургъ дайва ниттил. Дияча ца гьарца даймуниву итххярхсса, нава бакъара га кунмасса. Жун ккавксса ккашигу, мякьгу, маоьрдугу зун къаккакканнав тIий дикIара ва дунияллий. Дуниял паракьатну личIаннав учияра, ккашин букансса ччатI зува лякъинсса», — учайва ниттил.
ПатIимащал захIматрал фронтрайн лавгун бур Алхасхъал ПатIима, Маржанат, Ханича, Умукусум, Загьидат, ялагу биялсса душру, цавай лаглай, гайми букIлай, бригадартту бувну.
Ниттил дакIнин бичавурттава:
-Жул аьравачину жу миналийн биян буван учIайссия ГьунчIукьатIатусса, аьпа биву, ЧIиби – ияча ца иминсса, насихIат бусайсса инсан. «Душрув, даццил, укун бувара, тукун бувара», — куну, арнил кIанттай цукун къуццу тIун аьркинссарив, баргъ къалачIун ци дуллан аьркинссарив буслан икIайва жухь. Бия цаймигу. Жун дулаймуниягума кьукьлакьисса, ссуссукьу дуллалисса чан къашайва. Цибанссар, халкь жура-журасса бикIайхха… бусайва.
ПатIиман «Лучшая доярка» тIисса цIагу дуллуну, кказитрай ванил цила ябувсса гъаттарачIа-бюрчурдичIа бавцIусса суратгу рирщуну диркIун дур та чIумал Амин Чутуевлул. Ванил ябувсса бярчру хъинну ябацIансса бугъри хьуну, оьллавун бакьин буцайсса бивкIун бур. Щар хьуну махъгу, колхозрал давурттая махъунмай къавхьуну, махънин зий бивкIссар ПатIима КIямашрал шяраву. Инсантураву бусалалийн кIура бавну бур цIана, ххалал бавхIусса ттуккуй чансса килорду дикIайва ПатIимал мукьав лархъсса къурайнияр тIутIисса. Зунттурду мукьах бишлай тIисса кунма, захIмат буллай диркIссар жулла нинухъру.
ГьунчIукьатIрая колхоз личIи дурну, цила оьрчI завферману авцIусса шинал, гъаттара ккашил литIлай, дичинмур дакъа ливчIсса чIумал, цила пенсиялул арцугу дуллуну, цалва грузовой машиналий къутандалия лазуни ласун тIайла увккун ия ПатIимал цила арс. Мукун дугърисса тIуллу чIярусса хъамитайпа бикIайва, бунагьирттал аьпа биву, алжаннул ххари биву, Аминхъал ПатIима.
РухI хъинний дишиннав, ганил барачат махъ ливчIун лякъиннав. Арснал, душнил, арснал щарнил, махъсса уссурссуннал, ПатIима ххирану бивкIнал оьрмурдай барачат бишиннав, ганияр бугьара хьуннин битаннав, ганинуксса захIмат къаккакканнав. Амин я Аллагь.
З. Аьбдуллаева
