[dropcap]В[/dropcap]ана кьура шин ларгунни жу Лаккуйн бивзун. ЧIярусса дахханашивуртту хьунни. Мяйжаннугу ДучIиннал щар уттара дуклай дур, къатри дуллай бур, ххуллурду буллай бур. Му хъиндайдихьулул бакIрацI авцIуну уссия Айдамирдул арс Зияуттин Айдамиров. ЧIяру-чIярусса затру дан ччай уссия: НицIавкIрав, Маркьав чани буцин ччай уссия, ДучIив щин дуцин ччай уссия.

---

Зияуттин аьпалухьхьун лавгун хьунни 9 шин. ЦIана 20-25 инсан зана-кьулу хьунсса къатта-къуш хьуну буссар жул. Циняв оьрчIру, душру, оьрчIал оьрчIащал, уссурссу, ссура­хъал, бучIайссар хъамалу. Москавлия, Питердая, Анжилия, Каспийскалия, ЦIуссалаккуя бучIайссар гъинттул бигьалаган, Зияуттингу дакIнийн утан. БучIайссар, ваца зияратрайн кунма. Цуксса къахъинни ялун нанисса никиран кIулну бикIан цала ттаттал, хъунттаттал, цала буттал шяраву бартбигьлай ивкIсса мурадру, цала зунттал ватандалул тарих.

Зияуттиннул кабинетрая бувну буссар музейрал зумуну­сса къатта. Ванал каних дурсса затру, канил бугьайсса ярагъ, дуллусса бахшишру, ванал канил чичрурду, луттирду, музыкалул инструментру – гьарца зат низамрай дирхьуну ду­ссар . Зияуттиннул бищайссия мандолина, аккордеон. Жула оьрчIал оьрчIру бувкIсса чIумал, бялахъан буллай, къавтIи буллай икIайва.

Утти та чIумалсса мюрщи оьрчIая хьуну бур цив­ппа мяммахъул, дадахъул. Цала оьрчIащал циняв бучIавансса аьдат цIакь дан, ирсирай нани дан ччай бур.
Буттал шяравалу уттара дуккан даврих щала щекьи ув­ккун, мякь увккун икIайссия, аьпабиву. Шяраваллил статус цIакь дансса документру бу­ссия Халкьуннал Мажлисрайн биян бувну. Аьпа баннав, Арсен Каммаев усса чIун дия му. «Яла чара бакъасса 14 аьрзалувух зул Ду­чIиннал шяраваллил статус дансса аьрзагу бишинна кунни Арсеннул», — тIий увкIуна ххарину, рязину. Муния махъ Зияуттингу къашай хьуну, 3-4 шинай чунчIав ­уккан къавхьуну ливчIссия. Гьакссагу цачIанма бувкIминнахь тIийна икIайва, ттуща хъанай ба­къарча, хъирив буккияра тIий. ЛивчIссар му масъала бусса куццуй, Зияуттиннуя ливчуну махъ цайнма ласунсса чув къавхьуну. Ттунгу багьлай бия мудан мунал цIуллушиврулсса буллан.

Гъинттул ятту бувкIсса чIу­мал, гьарза шайссия агьлу. БучIайссия ваначIан сайки циняв хIухчалт, цайми-цаймигу инсантал, цIуллу-сагъшиврул ялувсса маслихIатру ккаккан, консультация дуван, хъин хьун.
ЖучIа бикIайссия «медпункт», Зияуттин ия хъинну за кIулсса хIакин. Къашайшалт хIатта жула машиналийгума биян байссия азарханалийн. Жуйн учайссия «ДучIиннал бригада скорой помощи» куну. Зияуттин ия уздансса -, чур­ххалгу, зана-кьулушиндаралгу, пикрирдалгу, дайсса даврилгу. Ци-духьурчагу, цалла дувай­ссия, захIмат ххирасса ия.
ЦIанасса чIумал бухлаглагисса ниттил мазрал буру­ккинттарай икIайва, мудан шяраваллавугума, мюрщиминная байбивхьуну, хъуниминнайн бияннин, циняв оьрус мазрай гъалгъа тIий бур тIий, бухIан къахъанай икIайва. Ванал гъира бувтун, ниттил мазрахух лавгун буссия ттула душнил душру.

КIиннилагу мусил медаллай лицейгу бувккуну, университетраву ччимур факультетрайн буххан хъанайгу бунува, лакку мазрал отделениялийн бувххун, мугу ххаллилну къуртал бувну, ННТ тIисса миллатирттал мазурдийсса телеканалданий зий буссар.
Зияуттин тачIавгу къау­ккантIиссар ттулгу, ттулциринналгу дакIурдивату, оьрмулувату. Мунал рухIгу личIантIиссар абадлий бюхттулсса ДучIиннал шяраву, буттал буттахъал ­оьттул ва ттурчIардил кьанкь ду­сса аьрщарай.

Бухьхьияра Зияутти­нну­чIангу, жучIангу хъамалу зунма ччимур чIумал. Жу мудангу ябуллантIиссару лакрал лайкьсса арснал аманат!
Нагу ттула Зияуттиннул ирс имандалий ябуллалисса Айдахъал СултанпатIимат Пакьил душ