[dropcap]В[/dropcap]ай гьантрай Дагъусттаннал литературалул классик МухIуттин Чаринов дунияллийн увккун там хъанай дур 125 шин.Цувгу ккаллину ивкIун ур ХХ-мур ттуршукулул 30-ку шиннардий Дагъусттанналлитературалул оьрмулуву агьамсса кIану бувгьусса инсаннан. Лакрал гимну хьусса «Лакку кIану» назмулул автор МухIуттинни.

---

Увну ур ХьурукIуннал шяраву, ларайсса кIулшиву ларсун дур Бакуй.
Гьарун Саэдовлущалсса, Саэд ХIабиевлущалсса, Ибрагьим-Халил Кьурбанаьлиевлущалсса хIала-гьурттушиврул кIункIу увну ур революциялул иширттайн. Ми ишир­ттал асар бивну бур ванал творчествалийнгу, цавува шаэршиврул гьунар аьч бувсса эшкьи-ччаврил темалия яувцун, чичлай айивхьуну ур философиялул ва социал-политикалул асар бусса шеърирдугу.
ХьхьичIунсса кIану бугьлай ивкIун ур жяматрал оьрмулу­вугу. 1913 шинал МухIуттин Чари­новлул цала буттал шяраву ХьурукIрав сакин дурну дур художественно-просветительский кружок, «ЦIу­зурул мажлис» тIисса. Махъ му кружокрацIун цачIун хьуну дур «ЦIубарз» тIисса Гъумуксса кружокгу.

Цаппарассалийла бивхьуну бур Гьарун Саэдовлул «Къалайчитал». Спектакльдануву роллу дугьлай бивкIун бур гъинттул шаппай бувкIсса студентътал ва хIалтIухъантал. Ва кружок сававну тамашачитуран театр ххира хьуну бур.
1919 шинал МухIуттин Чариновлул Щурагь чивчуну бур цала цалчинсса пьеса – «ХIажияв ва ХIабибат». Мура шинал му пьесалийнусса спектакль бивхьуну бур цайнува цивппа хьусса артистурал Гъумук ва Щурагь. ХIабибатлул роль дургьуну дур Бакуйннал реальный училищалул студент Амировлул, ХIажиявл роль дургьуну дур хIаписар Аьвдуллагь Къашкъаевлул, ХIабибатлул буттал роль дургьуну дур Шяпи Къашкъаевлул. Скрипкалий музыка бишлай ивкIун ур цува МухIуттин Чаринов. Пьеса шеърилийну чивчусса бухьувкун, му балайлийну щаллу бувну бур артистурал.
ХIалли-хIаллих кружокрал даву сантирайн дагьну дур. Салкьи хьуну дур репертуар.

Дагъусттаннай совет власть цIакь хьуну махъ Гъази-Гъумучиял округрал агьалинал батIаврий 1920 шинал октябрь зурул 20-нний баян бувну бур театр тIитIаврия. Актертурал группа сакин хьуну бур 13 инсанная. Жагьилсса коллективрал даву саргъун хьуну дур. Бихьлай бивкIун бур чIумул цIуцIи кIантту, жяматран агьам­сса буруккинтту сукку буллали­сса, хъамитайпалул ихтиярду ссу­ссукьу даврийн багьайсса спектакльлу. Му темалун хас був­сса бур МухIуттин Чариновлул шанмагу спектакль: «ХIабибат ва ХIажияв», «Шагьалай» (1920), «Шумайсат» (1921). Шанмагу спектакльдануву оьрмулул ва талихIрал гьану хъанай дур ччаву. Ччаву бюх­ттулсса кьиматрай дур, оьрмулияр агьамну ва ххирану дур, ччаврил цIаний жандалий хIайп тIий ба­къар ХIабибатгу, Шагьалайгу.

Лакрал театрданул завлит Гулизар Султановал бусласимунийн бувну, агьамсса кIану бувгьуну бур МухIуттин Чариновлул «ХIажияв ва ХIабибат» пьесалул Лакрал театрданул репертуарданувугу. Му бивхьуну бур 30-ку шиннардий ва 50-ку шиннардий. ХIабибатлул роль дургьуну дур Пахай Аьлиевал, ХIажиявл роль – ОьмархIажи Исяевлул. Пьеса цIунилгу бивхьуну бур 70-ку шиннардий, Валерий Эфендиев Москавлив Щукиннул цIанийсса училище къуртал бувну увкIсса чIумал.
«Шагьалай» бивхьуну бур 90-ку шиннардил дайдихьулий. Шагьалайл роллу дургьуну дур та ппурттуву дахьва театрданувун зун бувкIсса, утти тIурча, Дагъусттаннал халкьуннал артисткахъал цIардан лайкь хьусса Луиза Шагьдиловал ва Саният Рамазановал.
Лакрал театр цIунилгу кIура баен дакIний бур вай спектакл­лайн.

ХIадур бувссар
Зулайхат Тахакьаевал