[dropcap]Л[/dropcap]ачIун буккаврил Аьрасатнал цачIундур командалул хъуна-хъунама тренер Дзамболат Тедеевлул журналистътурал суаллахьхьун жавабру дуллунни Каспийскалий хьусса Европанал чемпионатрал хIакъираву. Мунал хъин чулийссаннун ккалли дурунни Аьрасатнал лачIунбуккултрал хьун дурсса хIасиллу.

---

ХI. Аьдилов
«Аьмну ласурча, команда хIадурну дия ва турнирданийн. Жу дурссар 4 сбор Сочилий, циняв жулва лачIунбуккултрал ккаккан бувссар цалва бюхъу, гьунар. Жулва оьрчIал жаваб­лувшиву хъун дуллай дия чемпионат жучIара даврилгу, муниятур хIасиллугу аьркинсса куццуй­сса хьусса. На ххарину ура укун­сса хIасиллу шаврия», — увкунни Дзамболат Тедеевлул.

Жулла командалул дурххунни 8 медаль, миннувату 6 дур мусил ва 2 арцул. Европанал чемпионтал хьунни: ХIажимурад Рашидов (61 кило), МахIаммад Кьурбанаьлиев (70 кило), АхIмад ХIажимахIаммадов (79 кило), Артур Найфонов (86 кило), Аьвдурашид Сяъдуллаев (92 кило) ва Владислав Байцаев (97 кило).

Арцул медаллу дурххунни Заур Угуевлул (57 кило) ва Илияс Бекбулатовлул (65 кило). Наградартту дакъа ливчIунни Хатик Цаболов (74 кило) ва Мурадин Кушков (125 кило).
КIилчинмур кIану бувгьунни Азирбижаннал цачIундур командалул, шамилчинмур – Тур­­к­нал цачIундур командалул.
Каспийскаллал Европалул чемпионатрал ттугъ буллунни хъиривмур сакиншинначину хьу­сса Румыннал билаятра­хьхьун.