Аьгъушиву ядайссар гъапI увкуну ларкьусса тIахIунттуву, цIансса, кьавкьсса, дюхлулсса кIанттурдай дирхьуну.

***
— ЯтIул кьая, салатрал чIапIив, шпинат, кьурчI, щюлли чимус, гъаран, петрушка яшайссар цаппара гьантрай холодильник­раву, ялун дяркъусса щинал кIунтIругу бивчуну целлофандалуву дирхьуну ядарча, цирдагу холодильникрал лувра-лувсса полкалий дирхьуну.

***
— Нисварти, помидор, бадиржанну, кабачок, нацIу мамаш ябайссар мукунма лувсса полкалий, амма ми целлофандалул чантайлуву бишин къабучIиссар, нухлул шайссар. Вай аьркин­ссар, кьалакьигу дакъасса, сир бувк кIургулттуву ягу сир бувк кIункIурдуву къатру-къатру дурну бишин.

***
— ДикI чIявуминнал ядай морозильникраву, полиэтилендалувугу дирхьуну. Холодильник бакъахьурчарив, га яла кIиримур кьинигу дикI кIира ссуткалий ххуйну яхьунтIиссар, ссиркалий атил дурсса аццувугу дархIуну, дюхлулсса кIанай диширча, ягу, атил дурсса полотенцалувугу дархIуну, синааьрщарая дурсса тIахIунттуву дирхьуну, га цурда тIахIнигу цIу бивчусса щингу дусса цамур посудалуву диширча.
Шанна ва ххишалагу ссуткардай яшайссар дикI, ххуйну лигу-лирхьуну, кьакьан дурну, ялтту дарцIан дурсса гъаттарал аьгъушиву дуккарча.

***
Нувщи ябайссар кьавкьсса дюхлулсса цIансса къатлуву (бухьурча, — лувчIин къатлуву) (+3-+5 градус гъилишиврул дусса).
Нувщун чани къаххира­ссар. Чани щилащисса нувщуву чурххан заралсса солонин сакин шайссар. Нувщун мукунна дяркъугу къаххирассар, 0 градусраяр яларайсса температуралий крахмал нацIушиврийн кIура баллай, нувщи нацIу хъанай, тIин зия шайссар.
Нувщи хъинссар, дянив­сса ккутIругу дусса ( гьава бухлан­сса) ящикирттавун бивчуну, гайгу кувннил ялув кув бивхьуну ябарча.
Нувщи ччяни ххяхлай, аьллай байбишайссар, мунияту ми чIун-чIумуй ххал буллай (15-20 гьантлий цал), зия хъанан бивкIмигу экьибичаван аьркинссар, сагъминнуйсса кIурхругу риттаван аьркинссар.

***
-Къур ва чIикIунтIа яшай­ссар 3-4 зуруй, ядан кIулну ядарча. Къур, ящикирттаву дирхьуну, ялун кьавкьсса къунгу бивчуну, лувчIинкъатлуву дишин аьркинссар. Вай ахънилссаннунгу, нувщун кунна, +3-+5 градус хъинссар. Так хъирив бацIияра, къун чан-кьансса хъавтуну хъин­ссар.

***
-Каландалунгу ххирассар цIансса дюхлулсса кIанттурду. БучIиссар ябан, полкардай бивхьуну, лувчIинкъатлуву ягу ккутIругу дусса ящикирттаву, чIумуя чIумуйн ялттусса зия хъанахъисса чIапIивгу букьлай.

***
-Чимусун ва лаччун ххира­ссар кьавкьсса, дянивсса температура дусса кIанттурду. Вайннун аьркинссар гьава. Мунияту лаччи-чимус ябайссар сеткалуву ягу капрондалул жулардаву. Хъинссар ххуйну кьакьан бувсса лаччи-чимус, хIаллу бувну, мюрайн лахъангу.

***
— ЧчатI целлофандалуву ца ссуткалияр ххишала битан къабучIиссар.
Хъинссар ччатI ябувну, марцIсса чагъарунниву ягу салфеткалуву бавхIуну. ЦукунчIав ччатI кказитраву мабахIару. КIя­ламур ччатI лухIимуния личIину ябувара.
ХIадур бувссар
Т. ХIажиевал