Зеленка хъинну лякъинтIиссар
[dropcap]Н[/dropcap]исварти ххуйну ххяххавриву, ми цаппарасса азардая буру­ччавриву зеленкалия ххуйсса кумаг шайссар. Щинал бувцIусса бадралийн зеленкалул 10 кIунтI хIисавну бувтIуну, хIала бувара. Ми щин дутIияра ххяхлахисса нисвартул къатIрайн. Зеленкалуву дуссар ххяххиялун чара бакъа аьркинсса микроэлементру.

Аспириндалул гургагу хъинссар
Нисвартилул, помидорданул ягу кабачкардал ххуйсса бакIлахъру ласун кумаг бувайссар аспириндалулгу. Гъилисса щинал 1 литралуву дассан дуван аьркинссар 1-2 гурга аспириндалул ва ми щин дутIин аьркинссар ххяхлай нанисса ахънилссаннул къатIрайн. Укунсса щин нюжмардий цал дуртIуну хъинссар. Раствордануха зун ччай бакъахьурча, аспириндалул ца-ца гурга дуччияра ахъуву, зунна ччисса ххяххиялул чIарав.

Йодгур хъинсса
кумагчи
Дургьумур ххуйну ххяххан давриву йодгур хъинсса кумагчи. Кьюнукьул къатIрайн 10 гьантлий цал щинал 10 литIралийн 10 мл. йодрал хIисавну хIадур дурсса щин пурх куну хъинссар.
Помидорданул рассада дахьра дургьусса чIумал ва дургьуну цаппара нюжмарду ларгун махъ, щинал ца бадралийн 3-4 кIунтI йодрал бувтIуну, ми дуртIуну хъин­ссар гайннуйн, бюхъавай, ца-ца къатIул лув ца-ца литIра щинал хIисавну. Укунсса щинал биялдарайн бувну ахънилсса ччяни диянтIиссар ва лагрулул хъуни­сса хьунтIиссар.

Ишла бувара
банандалул ккирттугу
Банандалул ккирттая ххя­ххиярттансса, ичIура чIава­хьулттийминнун тIий, ахъуву дургьуминнун тIий, хайр-мюнпат хъинну хъунмассар. Мунияту банан дуркуну махъ анавар мабу­ккаванну ккири экьибутан. Миву дуссар ххяххиярттан аьркинсса хъинну чIярусса минераллу. Бичияра банандалул ккиртту щинавун (бадралувун, кIункIурдувун), битияра ми миву щинал ялун бюнбутIив букланнин, яла ми щин дутIияра ххяххиярттайн. Бухми ккиртту экьикъабивчуна, миннул ялун цIу-цIусса бичлан бучIиссар, ккирттащал лув думур щинал ялун цайми щин дутIлангу бучIиссар.

Чявхъагъаралуннил хъирив кказа бувара нувщуй
Гужсса гъарал ларчIун махъ нувщуй кказа бувну хъинссар. Нувщул бакIлахъия кIилий авадансса хьунтIиссар.