[dropcap]В[/dropcap]ай гьантрай журналистътуращал хьунабавкьунни Аьрасатнал промышленностьрал ва инвестициярттал фондрал Вице-президент ХIажи ХIажиев ва Дагъусттанналэнергетикалул компаниярттал президент Изамуттин Жанбулатов. Пресс-конференциялий миннал бувсунни Дагъусттаннай цIанасса чIумалсса энергетикалул тагьардания.
ХIасан Аьдилов
ХIажи ХIажиевлул бусаврийну, жула региондалийсса токрал энергиялул ялун чIалачIисса каширду (потенциал) хIисавну дур ишла буллалисса энергиялул 50 процентран. Мунал пикрилий, Дагъусттаннал электроэнергетикалул захIматми кIанттурдуну хъанай бур хъунисса ГЭС-ру буллалисса чIумал арцу мюнпатну ишла къадуллалаву, электроэнергиялул муштаритурай миллиардру арцул ялув бихьлай бушиву,
Дагъусттаннай сакин хъанахъисса электроэнергиялухсса арцу ишла дуван къабюхълай бушиву, цанчирча ми арцу дуну тIий республикалул кьатIувсса энергосбытрал компаниялул биялалий.
[pullquote]ХIадур дурну дур Дагъусттаннал зунттал районнай 17 чIиви ГЭС баврин хасъсса план ва проектру.[/pullquote]
Миннуяр ххишалагу, ихтилатчинал бувсунни экологиялийн хъунмасса зарал бияйсса бушиву, хъуни ГЭС-ру буллалисса чIумал. Мунал мукунма бувсунни Дагъусттаннай геотермал луртанну (аьрщаравусса щин) ишла къадуллай бушиву. ХIажиевлул пикрилий, Дагъусттаннай буван аьркинни мюрщи ГЭС-ру, дянивсса даражалул ГЭС-ру. ХIадур дурну дур Дагъусттаннал зунттал районнай 17 чIиви ГЭС баврин хасъсса план ва проектру.
«Щинал луртанну чIяруми дур зунттал районнай – 12 азарва Мвт, амма зунттаву ишла буллай бур арнил зоналийминнаяр кIилий чансса ток, СКФО-рал регионнайнияр мукьлийну чансса. Энерготранспортрал системалий (яла токрал ххаллаву) 3 шинал мутталий ток чан хьуну бур дянивну лавсун шинай 1,560 азарва кВтчас», — увкунни ХIажиевлул.
Изамуттин Жанбулатовлул бувсунни электросетирдал иширттал хIакъираву. Миккугу яла захIматмур масъала бур тарифирттацIун бавхIуми. Мунал пикрилий, токрахсса тарифру бакъагьавай лахъ бувну бур.
Яла экспертътурал журналистътурал суаллахьхьун жавабру дуллунни. Вай ххару чивчуманал буллусса, «Тарифру укунмагу лахъ бувну бунагу, циванни агьалинай къабагьавайсса буржру бихьлахьисса, ччувччусса токрахсса багьа буллушиврул чекругу дунура инсантурачIа?» тIисса, суалданухьхьун экспертътурал вари чинсса жаваб къадуллунни. «Чубайслул чIумала «энергосбыт» тIисса компания бувну, арцулсса миннал буллай бур, мунияту жуща цичIав бан хъанай бакъар», — увкунни ХIажиевлул.
