[dropcap]С[/dropcap]талинградуллал цIанийсса талатаврин хьунни 75 шин. Миксса шиннардил хьхьичI Волга неххачIа хьуссар Буттал кIанттул цIанийсса дяъвилул рищавурттаву ца яла къизгъинмур талатаву.

Руслан Къардашов
[dropcap]С[/dropcap]талинград шагьру душманная буручлай хьуссар 200 хьхьу ва кьини.
Сталинград ласунсса кьасттирай ялун ххявхссар немец фашистътурал, Румыннал, Венгриянал ва Италиянал аьрал. Талатавриву гьуртту хьуссар кIивагу чулуха 2,5 млн. саллатIнал, миннавух – 2,5 азара дагъусттанлувгу. Дяъви къуртал хьуннин талай ивкIсса 12 зунтталчу лайкь хьуссар Совет Союзрал Виричунал цIанин, миннавух кIия ла­ккучугу – АхIмад-хан Султан ва ЦIаххуй Маккаев.
Ва талатавриву совет саллатI­нал ва шагьрулул агьали­нал ккаккан бувссар гьунар ва виричушиву.
«ЯтIул Октябрь» ва тракторду дай заводирттал зузалт, дахьра дартIсса танкардай щя­бивкIун, цехирдал дянивсса аьрщарай фашистътуращал рищаврин буккайсса бивкIун бур. «Мамаев Курган» 13-ла канища канихьхьун лавсун бур немецнал ва жула аьраличутурал.
Сталинградуллал талатавриву ххув хьусса Совет Союзрал аьра­луннал канихьхьун лавсъссар фашистътурал 2500 хIаписар, 24 генерал ва 91 азара саллатI.
1942 шинал июль зурул 28-нний бувкссар Обороналул Наркомрал амру «Ни шагу назад» тIисса. Муний ккаккан був­ссар щаллу бан загранотрядру ва штрафротарду, командирнал амру къабуллуна махъунай хьума танмихIрайн кIункIу ан.
1942 шинал август зурул 1-нния октябрь зурул 15-ннийнин Сталинградуллал фронтрай заг­ранотрядирттал бацIан бувну бур махъунмай ливхъун нани­сса 140 азара саллатI, миннава 28 азара гьан увну ур штрафротардавун. Увгьуну, силистта бувну бур 4 азаруннаяр ххишаласса саллатIнан, миннава азара ­аьщун ивзун ур. Дяъвилий укун­сса ишругу бивкIун бур.
Сталинградуллал цIанийсса талатаву хьуссар Хъун дяъвилийсса хъуннасса ххувшаврил дайдихьуну.