ТIабиаьтрал кьимат лиян къабитан

[dropcap]Я[/dropcap]нварьдания шиннай респуб­ликалул цаппара школар­ттай «Дагъусттаннал тIабиаьтрал яла мюхчан бувми кIанттурду» тIисса цIанилусса дарсру дирхьуну дур.

З. АьбдурахIманова
[dropcap]В[/dropcap]ай дарсру цирдагу шагьрурдал ва районнал гьанулул школарттай дирхьуну дур Президентнал грантрал кумаграйну. Аьмну ттинин кIулшивуртту дулайсса 18 идаралий билаятрал заповедникирттан хасъсса дарсру дирхьуну дур. Миннувух гьуртту хьуну ур 524 дуклаки оьрчI, 22 педагог, «Дагестанский» тIисса паччахIлугърал заповедникрал 7 зузала, «Малая академия наук Республики Дагестан» ГБУ ДО-лул 4 педагог ва «Президентнал грант» тIисса проектрай ххув хьусса кьюкьравасса 3 инсан.
Дарсру хас дурну диркIун дур 1997 шиная шиннай январьданул 11-нний кIицI лагайсса Аьрасатнал национал паркирдан ва заповедникирттал кьинилун. Ми дихьлайгу бивкIун бур биологиялул ва географиялул дарсирдал учительтурал.
Укунсса журалул дарсирдал мяъна-мурадгу оьрчIан тIабиаьтрал кьимат бищун, му дуруччин лахьхьин бавур. ОьрчIан хъинну ххуй дирзун дур республикалий ца бакъа-бакъасса «Дагестанский» заповедникраясса ва мунивун багьайсса кIанттурдал тIабиаьтраясса дарсру. Вай дарсирдал жаваблувминналгу, уттизаманнул техникалул хIаллихшиннардугу ишла дурну, хъунмасса хIарачат бувну бур дуклаки оьрчIан дакIру дакьинну ва даву дуван. Ккаккан дурну дур заповедникраясса фильмру ва виртуал журалий оьрчIру сайрданий бувцуну бур тIабиаьтрал авурсса кIанттурдайх. ЧIявусса кIукъакIулсса, бувчIин бан багьлагьисса затру бувсун бур оьрчIахь. Бувсун бур мукунма, Дагъусттаннал заповедникрая бакъа, Аьрасатнал личIи-личIисса регионнай­сса заповедникирттаягу. Гьарца дарсирал ахирданий яла чялишну гьуртту хъанай бивкIми дуклаки оьрчIан заповедникрал пишакартурал дакIний личIансса бахшишругу дуллуну дур.
Ялув кIицI ларгсса Заповедникирттал кьинигу январьданул 11-нний нахIакьдан кIицI лагай­сса дакъасса дур. Ва кьини Аьра­сатнаву цалчинсса, Баргузинский тIисса, заповедник тIивтIуну бивкIун бур 100 шинал хьхьичI. Му тIабиаьтрал хъунмасса тарихри. Ва иширан хаснур 2017 шингу Экологиялул шинну баян бувну диркIсса.