[dropcap]Ф[/dropcap]евральданул 21-нний Дагъусттаннал БакIчинал кIанайма Владимир Васильев хьунаавкьунни республикалул политикалул партиярттал вакилтуращал, миннавух бия региондалул отделенияртталссагу. Владимир Васильевлул бувсунни, цачIун хьуну, Дагъусттаннай Аьрасатнал Президентнал бувчIавуртту аьчухсса, аьямсса дуван аьркиншиву.

Дагъусттаннал БакIчинал бусаврийну, хIакьину республикалий бур политикалул партиярттал 60 отделение, ми хъанай ур сайки 180 инсан. «Уттинин республикалий бувчIавурттал компанияртту шайва личIи-личIину, хIатта закон лиян дурсса ишругума хьуну бия. Муния буслай бия партиярттал вакилтуралгу, АьФ-лул ЦИК-ралгу», — увкунни В. Васильевлул.
Республикалул каялувчинал бувсунни цIана аьркинну ушиву республикалул омбудсменнал къуллугърай итансса инсан. Мунал бавтIминнахь тавакъю бунни му инсан, партиярттал вакилтуравату ххал увну, хьхьичIун ласун, цIа рищуншиврул. Партиярттал вакилтурал республикалул каялувчинахь тавакъю бунни къуллугъирттай битансса инсантал ххал буван, МахIачкъалалив бакъасса, районнайгу.
Хьунабакьаврий ихтилатру бунни парламентрал политикалул партиярттал каялувчитурал ва парламентрал дакъами партиярттал вакилтурал. Ихтилатру хьунни чIал дакъа хьунтIисса АьФ-лул Президентнал бувчIавуртту аьчухну, марцIну даврил ххуллурдая, инсантал бувчIавурттайн бувкIун, чIурду булунсса шартIру дузал дуван аьркиншиврия.
Лажин хIадур дурссар

ХI. Аьдиловлул

---