Аьлил арс ХIасанов МахIаммад-ТIагьир
[dropcap]О[/dropcap]ьрмулул 78 шинаву жуятува личIи хьунни Вихьуллал шяравасса Ханнал Аьлихъал тухумраясса Аьлил арс ХIасанов МахIаммад-ТIагьир. Ва цала бусса оьрмулий зий ивкIссар буттал шяраву учительну.
МахIаммад-ТIагьир увссар Вихьуллал шяраву 1939-ку шинал. ЧIяйннал шяраву ацIва классгу бувккуну, увхссар Дагъусттаннал ПаччахIлугърал университетрал физикалул факультетрайн. Му къуртал бувния шинай Вихьуллал школалий физикалул дарсру дихьлай ивкIссар.
МахIаммад-ТIагьир ия хасиятрал кIукIлусса, оьрчIан къаччан къабикIанну ихтилат байсса учитель. Цалвагу хъинну тIайлану оьрчIан кьиматру бишайссия. Цалий къадарцIусса оьрчIал дакIурдил хIасиллу ванан хъинну ххуйну кIулну дикIайва.
Ва ия захIматрал ветеран. Ванал хIалал дурссар «Знак Почета» орден, чIярусса хIурматрал грамотартту ва бахшишру. Ва ия лахъсса категориялул педагог.
МахIаммад-ТIагьир ахиратрал шаврил пашманшивугу кIидачIлай, дакIнихтунусса жижара буллай буру кулпатрахь, арснахь, душварахь ва махъсса цинявппагу гъан-маччаминнахь. Цал бунагьирттал аьпа баннав, рухI хъинний дишиннав.
Вихьуллал жямат
Жу, Вихьуллал школалул коллектив, хъуннасса кьурчIишиву кIидачIлай буру жула уртакь, чIярусса шиннардий Вихьуллал школалий архIал зий ивкIсса
ХIасанов МахIаммад-ТIагьир
ахиратравун лагаврийн бувну, ванал кулпатрахь Ххадижатлухь, арснахь Аьлихь, душварахь, гъанссаннахь.
Махънал оьрмурдай барачат бишиннав, МахIаммад-ТIагьирдул рухI алжаннул ххари даннав, гьав нурданул дуцIиннав.
Вихьуллал школалул учительтал
Макьсудлул душ Темирова (ЦIаххаева) Рукьижат
Оьрмулул 84 шинаву дунияллия лавгунни ххаллилсса лакку хъамитайпа Макьсудлул душ Темирова (ЦIаххаева) Рукьижат . Бувну бур Рукьижат 1934 шинал Шушиннал шяраву.
ХхюцIалунния лирчусса шиннардий зий бивкIун бур Дагъусттаннал педуниверситетраву ва цила оьрму хас бувну бур оьрчIан кIулшивуртту дулаврин, ялун нанисса ник Ватан ххирану тарбия даврин.
Рукьижатлул бивзссар Дагъусттаннал педуниверситетраву Совет Союзрал Виричу Ризван Сулаймановлул цIанийсса музейрал гьану ва бусса оьрмулий муний каялувшиву дуллай бивкIссар. Рукьижат лайкь хьуну бур личIи-личIисса бахшиширттан ва грамотарттан. Ва бишин-битан кIану бакъа ххирасса бикIайва студентътуран, «Рукьижат ниттилсси» тIий бакъа зума къабахъайссия. Ва цуппагу цила оьрчIаха кунма, студентътураха аякьалий бикIайва.
Рукьижат бия бавцIусса кIанай сий дусса, мукъуй цIу бусса, дакI-аьмал хъинсса инсан. Ванил хIурмат хъунмасса бия цуппа зузисса коллективрал дянивгу.
Рукьижат аьпалул шаврил кьурчIишивугу кIидачIлай, жижара буллай буру оьрчIахь, махъсса гъан-маччанахь.
Имандалий лавгун лякъиннав, алжаннул ххари баннав.
Дагъусттаннал педуниверситетрал преподавательтурал коллектив
«На урувччуну яуванна цIими бума»
Февраль зурул 22-нний 2 шин хьунни ттул ххирасса уссу, Гъазахъал Ширвани ахиратравун лавгун. Аьпалувух ивхьусса чIумал 79 шинаву уну, ажал нязаннивсса бакъанугу, уссил бивкIу уссурссуннангу, жяматрангу хъинну кьурчIисса ва пашмансса хьуна, цанчирча ганал цIуцIаву къювулийсса диркIун тIий ва, цала кIул къабулларчагу, язугъну ларгун тIий тамансса кьинирду ва хьхьурду.
Ттун тIурча, уссил ахир цIалацIи щавуну хьунни, ялув кIицI лавгмунил ялун уссу ттуяр ххюра шинал чIивиссагу ивкIун тIий.
Давривугу хьхьичIунсса, жяматравугу бусравсса инсаннаяту, сагъни хьуннав, аьпалувух ивхьуни хьуннав, бусаван аьркинссар жува (гьай-гьай, сагъни хъинни). «Илчи» кказитрай рирщусса мукунминнаясса макьалартту на рязину ва ххарину дуккара. Хаснува гъанминная гъанминнал чивчумур. Исламрайгу гъанцириннал цаннал-цаннащалсса дахIаврин хъунмасса кьимат бивщуну бур. Ца хIадисрай Аллагьнал куну бур: «На дулав гъанминнащалсса дахIаву дуруччаврин Ттула цIардавасса ца цIа – Ар-РахIман (цIими бума). Мунияту му дахIаву дуруччайма На хъун уванна, мунан кумаг буванна, урувччуну яуванна».
Амма жула дянив чан къашай, шиннардий ххавххун, кувннащал кув гъалгъа къатIисса уссурвал ва ссурвал. Бунагьру яла бичин Макка-Мадиналив хIаж бан заназиссагу бур миннаву. Амма миннан кIулну бакъар Аллагь хъяврин ан къашайшиву.
Ттула уссияту бусанмур чIявусса бунугу, бусанна ттунма ххирану чIалачIимур.
Жула чIявусса лакран кIулсса, Уручратусса ХIажи МахIаммадовлул («Польский докторнал») чIявуну тикрал бай: «Да дус Гъазай, га вил уссу Ширвани, малаик куна, марцIсса, уздансса ия», — куну. Ганаяту мукунма хъинмур тIутIисса ялагу чансса бакъар.
Ххуйсса такьвагу, чIугу бусса, балай учаврил гьунар тIабиаьтралва буллусса уссил хъунмасса кьимат бищайва цала хьхьичIунсса дус, композитор Мазагьиблул творчествалун ва ганал чIярусса макьаннай балайгу учайва. Мазагьиблунгу уссиха чIалачIин къадикIайссия.
ЧIивинийва зирангсса, даву ххирасса уну тIий, школалийгу ххуйну дуклай уну тIий, циняннан ххирая. Ттуяр 5 шинал чIивисса унугу, шардаллил даву, ризкьилух уругаву ганалъя дайсса. Ттурзандалийсса жула ттарду, кунни, хIухчалтран кунма, кIулссия. ГъайтIун, цулун лагайссия. Армиялийн увцукунгу, аьрали частьрал командирнал ниттийн барчаллагьрал чагъар бувкIуна, уссияту цIарду дуллалисса. Шихва школалий унигу, ххуйсса спортсменъя. Армиялий гандболданул командалул капитанну ивкIун ия Дальний Востокрал округрай ванал команда чемпион хьуну дия.
Армиялия увкIун махъ, колхозраву зийгу ивкIун, яла жу бивзссару МахIачкъалалив. Шикку личIи-личIисса пишардай зий 4-5 шин дурну, 1965 шиная шихунай суратрищуну ивкIссар. 1980-ку шинайннин Ширвани МахIачкъалалив ца яла цIа дума суратрищуну ивкIссар. Ганияр махъ музыка чичайсса студиялийгу зий уссия. Бухмур автостанциялий бивкIсса музыкалул студиялийн увкIсса гьалмахчу, кIулчу Ширванинал хъамалу къаувну итакъаакьайссия. ЗахIматраву ларайсса ккаккияртту хьун даврихлу Ширвани шамила увчIуну ивкIссар шагьрулул Советский райондалул советрал депутатну, цимилагу лайкь хьуссар хIукуматрал хIурматрал грамотарттан ва бахшиширттан, дуллуссия «ЗахIматрал ветеран» тIисса цIагу. Депутатну усса тамансса шиннардий Ширванинал чIявусса инсантурал тIалавшинну (наказру) биттур дурну, халкь цахьва барчаллагь тIутIи байссия. Пенсиялийн увккун махъгу ванан игьалаган къакIулссия: чIахху-чIарахнал, гъанминнал газрал колонкалулсса, щинал крандалулсса, экьинанисса батарейкартталсса байссия, миннал бишай яру, ссятру, токрал чяйникру, пылесосру, утурду дакьин дайссия.
ЗахIматсса азар дахчуну, лавгунни ахиратравун ттул дакIния уккан къабюхъайсса, кару мусилсса аьзизсса уссу Ширвани. Так ина мудан чIалачIисса кунна лирчIунни ина дурсса чIярусса давуртту: азварданувух даркьусса плитка, кIилчинмур зивулийсса чуртту, магъив, ва цайми-цаймигу вил караматсса кушурду.
Даимангу барчаллагьрай ура, уссу къашавай уссаксса хIаллай, цикссагу хьхьурду уттара дурсса ганал щарссанихь ПатIиматлухь, душнихь Светланахь, арснахь Арсеннухь.
1975 шинал Ххувшаву ларсун 30 шин хьунадакьин Ххутрал жямат бавтIссия Комсомол паркравун. Тания шиннай цурда ца шин лях къалагайссар кIава паркравун ххут къабавтIсса. Та хьхьичIва-хьхьичI бавтIсса шиная шихуннайсса циняр батIавурттал цачIу ларсъссагу, личIи-личIину ларсъссагу суратру Ширваниналъя рирщусса, 2000-ку шиннардийн бияннин, гания махъми – ганал арснал Арсеннул. Ххутрал гьарца къатлувусса ми суратру мудан Ширвани дакIнийн утлансса хIуччардуну хьунссар.
Ширвани дазу дакъа ххирану уссия муначIату арх къавхьусса ссин Умукусуннун.
Укунсса хьуннав цинявнналагу ссурвал ва уссурвал, цинявппагу кулпатру.
Гъаза Гъазаев
