[dropcap]Ф[/dropcap]евральданул 14-нний ДР-лул БакIчинал кIанайма Владимир Васильев хьунаавкьунни Аьрасатнал спортрал лачIун буккаврил федерациялул президент МихаилМамиашвилищал ва «Европа – лачIун бу­ккаврил цачIунхьу дуниял» тIисса дунияллул халкьуннал дянивсса федерациялул вице-президент Георгий Брюсовлущал.

Хьунабакьаврил гьуртту­читурал ххал бивгьунни апрельданий-майрай Каспийскалий хьунтIисса лачIун бу­ккаврил Европанал чемпионат­райн хIадур шаврил масъалар­тту. Ихтилат хьунни логистикалул масъаларттая, ялун авиарейсру ххи даврия, турнирданий гьурттучитуран нигьачIаву хьун къаритаврил ва цаймигу масъаларттая.
«Укунсса даражалул бяст-ччаллу уттинин я Дагъусттаннай, я Ухссавнил Ккавкказнал федерал округрай къавхьуссар. Шиккун бавтIминнахь барчаллагь тIий ура дурсса давурттахлу. Аьрасатнал лачIун буккаврил федерациялул жуйнна дур­сса вихшала жура марцIну биттур дуванну», — кунни Владимир Васильевлул.
Ихтилатру бувминнал бусаврийн бувну, хIакьинусса кьини чемпионатрайн хIадур хъанай бур ккаккан дурсса низамрай, «ххуллул карталуцIун» бавкьуну.
Хьунабакьаврий гьуртту хьунни ДР-лул ХIукуматрал Пред­­седатель Артем Здунов, ДР-лул спортрал министр МахIам­мад МахIаммадов,
ДР-лул лачIун буккаврил хъуна-хъунама тренер Сажид Сажидов ва цаймигу.