[dropcap]Ф[/dropcap]евральданул 14-нний Да­гъусттаннал БакIчинал кIанайма Владимир Васильев хьунаавкьунни республикалул премьер-министр Артем Здуновлущал. Микку ххал диргьунни ДР-лул ХIукуматрал цIусса сакиншиндарал структура.

[dropcap]А[/dropcap]ртем Здуновлул бувчIин бунни цIуну дуллалисса дахханашивурттал мурад бушиву министртурал кабинетрал давурттал мюнпат лахъ шаву. Масалдаран, цIусса сакиншиндарал сияхIрай ккаккан бувну бур ДР-лул ХIукуматравун бухлахими чан буван, миннал дуллай бивкIсса давуртту ливчIминнайх дарчIуну. Каялувшивурттавугу дан тIий дур кьянкьашивуртту, экономикалул ва финансирттал масъаларттах къулагъас ххи дурну. Ми кIивагу масъала ккаккан бувну бур цIакь буван ДР-лул ХIукуматрал ПредседательнацIун. Артем Здуновлул пикрилий, цаппара ХIукуматрал Председательнал хъиривчутурал ва министртурал къуллугъру ца-ца инсаннайн тапшур бувну хъинни. Мунийну къуллугъчинал жаваблувшиву хъун хъанахъиссар, муначIа дикIантIиссар аьркинсса циняв луртаннугу, мунал каялувшиврийсса инсантурахсса къулагъа­сгу ххи хьунтIиссар.
Хьунабакьаврий мукунма кIицI лавгунни республикалул бюджетрал доходралмур бутIа щаллу баван аьркиншиву. Мунийн бувну ДР-лул ХIукуматрай ккаккан бувну бур бюджет щаллу баврил давурттахлу жаваб дулай­сса ХIукуматрал Председательнал хъиривчунал къуллугъ.
Владимир Васильевлул хъин чулий ккарккунни ХIукуматрал Председательнал хIадур дурсса сакиншиндарал структура.