ОьрчIру ххари бунни

ОьрчIру ххари бунни

Мюрщисса оьрчIру ххари баву чириссар учай. ЦIуллу-сагъшиврул ссуссукьушиву дусса оьрчIру ххари барчаннив, ххишаласса чири бухьунссар. ОьрчIрурив буниялагу ххарину бия. Ххарину бия нацIу-кьацIулул бувцIусса ЦIушинал бахшишрал кьуцурттая, ххарину бия цачIанма бувкIсса Дякъил ттаттая, ва ххирасса персонажирттая.
ЦIусса шинал байрандалул хьхьичI гьантрай цIуллу-сагъшиврул ссуссукьушиву дусса оьрчIансса ххаллилсса мероприятие хьунни ипподромрай. Ванил сиптачигу хьунни шикку зузисса укунсса оьрчIащал ипотерапевтну зузисса жула лакку душ Асват Аьлиева.

А. Аьбдуллаева
— Чирилул акция дан савав хьунни вай оьрчIру ххари бан, вайннан ЦIушинал бахшишру дан дакIнийн багьсса чумартсса инсантал. Вайннал дартIсса сайки 70 азарда къурушрах жу ласарду шиккун бувкIсса цинявппагу оьрчIан нацIу-кьацIу дирхьусса кьуцуртту, ми бакъассагу, ца мушакъатсса оьрчIан ласарду коляска, — буслай бур Асват.
Ва кьини ипподромрай­сса шадлугърайн бувкIун бия МахIач­къалаливсса нину-ппу бакъа­сса оьрчIансса 4-мур школа-интернатраясса, «Забота» интернатраясса, чаннал ссуссукьушиву дусса оьрчIал школа-интернатраясса, мукунмасса Избербашливсса интернатраясса оьрчIру. Вай тяхъа-таза щад бунни «Тачки» тIисса оьрчIал клубрал зузалтрал бучIан бувсса аниматортурал. ОьрчIахьхьун ва кьини дучрай щябивкIун хIаз ласунссагу мутта биривунни. Дялахърулий тамаша буллалисса оьрчIайх бачIин булкарду, сокру, ахъулсса дирхьусса кьуцуртту хIадур бувну бия «Благосфера» тIисса чирилул фондрал. Чирилул мероприятие наниссаксса хIаллай шикку бивхьуну бия ччинал арцу дичинсса урна. ДартIсса арцу ахIвал кIюласса кулпатирттан ва мушакъатсса оьрчIру бусса ниттихъан кумагран дулун­сса пикри бия акциялул сакиншинначитуран.

Читайте также: