[dropcap]М[/dropcap]ариян Илиясова ттун кIулссия ваниннин 55-56 шинал хьхьичIва. На та чIумал ура Дагъусттаннал университетрал физика-математикалул факультетрай дуклай. Университетрал ххуйсса хор бикIайссия. Мунил магьирлугърал каялувчинугу, дирижернугу Кац тIисса музыкант ия. На гара шинал хорданийн занан ивкIра. Хъиривмур шинал филологиялул факультетрайн дуклан бувххуна Мариян. Га бия паракьатсса, мяърипат дусса душ.
Сулайман Мусаев
[dropcap]У[/dropcap]ниверситетрал хор хъинну сий дуну дия. Хор, Бакуйннал университетрал дяъватрайн (приглашение) бувну, Бакуйнгу ларгссия. Жу тикку, университетраву бакъасса, педагогикалул институтравугу концерт дуллуссия. Ттун дакIнийссаксса, тихун Мариянгу буссия.
Мунияр махъ на Москавлив дуклай ивкIра. Мариян щар хьуну бия Сиражуттиннун. Сиражуттиннущал хъуннасса хIалашиву дакъанугу, жул кIулшиврул мархри хъинну куртIссар: жул ппухърува ххуйсса гьалмахтал бивкIссар.
Ттул Марияннущалсса кIулшиву цIуларгуна ацIрахъул шинну ларгун махъ, на «Илчи» кказитрай зузисса чIумал. Ганил оьрчIру, хъуни хьуну, ххуй-ххуйсса къуллугъирттай бия. Амма Марияннул ляличIишиву, цув чиха къалащаву мурихха, га машгьурсса ласналгу, хъинну итххявхсса арсурвавралгу чIарав цуппа чIакъачIалачIи къашаву, миннал ххютулу къаличIаву, ялунгума жула миллатрал дянив лайкьсса кIану бугьаву.
Ттун къакIулли ча дакIнийн багьссарив Марияннун «Дараччи» хъаннил клуб сакин бан. Мукунсса салонну Европанал тарихраву къачансса бивкIссар. Флоренциянаву (Италия) махъ нанисса Медичихъул тIисса кулпатрал магьирлугъ хьхьичIуннай давриву цуксса хьхьичIунсса кIану бувгьуссарив кIулсса за бур. Мукунмасса салонну Наполеоннуяр махъсса Франциянаву Парижлив бивкIшиву, ва миккусса бястирдал цукунсса кIану бувгьуссарив му ппурттуву романтизмалул шавкьиравун бувтсса Франция реализмалухун багьан бан (Хх.б. Стендальлул «Расин и Шекспир») – мугу литература ххираминнан кIулссар. Миччар «Дараччи» клубрал гьану нанисса учинсса кьаст ттул дакъар. Ттун ччимур Флоренциянавусса тай Медичихъал, Парижливсса салоннал бувгьуну бивкIсса кIану бувгьуссар «Дараччи» хъаннил клубралгу лакрал культуралуву, куну, учинни. «Дараччи» клубрал чIявусса луттирду бищун бунни, чIярусса хьхьичIуннайшивуртту хьун дунни, гьунар бусса хъаннин, душваран ххуллу тIитIин бунни.
Тай шинну тIурча, къабигьасса дуссия, школардай паччахIлугърал итабавкьусса учебникру биял къашайва, чичултрал луттирду бишлашаву хъинну чIири лирчIуна.
Марияннул чантI учаву цуксса хьхьичIуннайсса диркIун дурив ккаккан дан, цукунсса чIаравбацIаву дурссарив ккаккан дан, на буцинна анжагъ ца-кIива мисал. «Илчи» буккултран дакIнийссар, лакрал героиня ПартIу ПатIимал цIанил хIакъираву кказитрайгу, литературалувугу цукун къизгъинсса бястру, авазартту бивкIссарив. (ТIайламур бусан, ми бястру мадара куклуссагу, цаннайн цаннал лагьу-лахъунтту буллалиссагу бия.) Хъунмасса хIарачат бувссия Аьхъаратусса МахIаммад ЦIаххаевлул ПартIу ПатIимал цIа машгьур дуллай. Барчаллагь цан. Амма ЦIаххаевлул иш хъиннува ури бичингу бувна, ПартIу ПатIима Аьхъаратусса бивкIссар, тIий, исват бан къашаймур исват буллай. ПартIу ПатIима цала шяравун кIункIу буллай икIайссия ЧIурттащатусса Магьдигу. Хьурттал АьбдуллатIипов АьбдуллатIиплул, ПартIу ПатIимал зияратгу цала буттал шяраваллил лухччай бухьувкун, ганияту ца-кIива махъ чивчукун, Магьдил: «АьдуллатIиплун хъинну ххуйну кIулссар, ПартIу ПатIима часса бивкIссарив», – тIий чивчуна, ай, АьвдуллатIиплул цал ЧIурттащатусса ПартIу ПатIима цалалуш бан кьаст дуллай ур, тIий. Ца ккуличунал чивчуссия: «ПартIу ПатIимал чурххайсса гужралва буслай бур, га Ккулатусса бакъа, чатучIавсса бикIан къабюхъайшиву», – тIий.
Микку махIатталсса цичIав бакъассар – гьаркаснангу пахру бан лайкьсса лаккудуш цала шяраватумурну ччай бушиву.
Мариян Илиясова тIурча, ми бяст-ччаллавух хIалавагу къабувххуна. ЧIяву хаварду къабувсун, цила сиптталийну, цуппа бакIчисса хъаннил клубрал хIарачатрайну ва кашилийну дан дурну скульптор МахIаммад-Аьли Аьлиевлухь ПартIу ПатIимал гьайкал, дацIан дуруна му Гъази-Гъумук Гьухъалла къурув, мунийну бюхттул дурну ПартIу ПатIимал цIагу, скульптуралул автор МахIаммад-Аьли Аьлиевлул цIагу, цила, Мариян Илиясовал, цIагу. Бия, тIайлассар, жуяту арцу датIлангу цивана, Илиясовхъул цивппа аваданну бунува, тIиссагу. Амма мугу Марияннул хъинну аькьлу буну дурсса даву душиврул барашинни – чанссарагу арцу дуллусса хъамитайпа бикIантIиссар, цуппагу му бусравсса давривух гьурттушин дурмурну ккалли буллай, му даврияту ххарину. Му тIагу-тIайлассар, му хъинну лайкьсса ххаришивур, пахру бан лайкьсса ххаришивур. Муниятур ПартIу ПатIимал гьайкал Лакку билаятрал символну дусса.
1999-ку шинал на ГТРК-лул лакрал редакциялул хъунама редакторну кьамул увнав. Ттул давриву хъуннасса чIарав бацIаву дурссия на даврийн кьамул увсса МахIаммадлул ХIамидовлул, цIанасса каялувчи Луиза Аьлихановал, председательнал хъиривчу Ссалам Хавчаевлул. Барчаллагь цайн. На ттула даврий чIарав бавцIуминнал цинявннал цIарду шикку, Мариян Илиясоваясса макьалалий, кIицI къадулланна. Мариян ЧIибиевнал лакрал радиолул чIаравбацIаву хъинну хъуннассар. Ттун му шикку кIицI дан ччай дур. Марияннул жул коллективрахь гьарца байран барча дайва. Телефондалувух дакъа, цуппа, шанма-мукьва хъамитайпалущал, ссайгъатиртталгу балгуну бувкIун. Жущал ссупралух щябивкIун, ца-ца, кIи-кIи балайгу щаллу байссия радиолий зузисса душварал, Тамара Закарияевал, СалихIат Исяевал, Асли Штанчаевал, Мисиду Давыдовал, цал-цал жу, арамтуралгу, учайссия. Кумаг байва Марияннул редакциялун аьркинмур ласун. Марияннул сипталийну жул редакциялий ремонт дан бригада бувкIуна банкираяту, Сиражуттин Илиясовлул гьан бувну. Щала Радиолул къатраву ца жул редакциялийя ремонт дурну дусса. Яла махъ Луиза ХIажиевнал щала Радиолул къатраву ремонт дуллан бивкIсса чIумал, жул редакциялул шанмагу къатлуву цаннивурагу ремонт дан аьркин дакъашиву чIалан бивкIуна. Сиражуттин Илиясовлул жул редакциялий мебельгу цIудан дуруна. Мугу Марияннул дакIнийн бувтхьунссия.
2011-ку шинал на сакин бувссия «Лакку маз лахьхьин бай лу» (самоучитель лакского языка). Му луттирахлу ттун президентнал грант дурккуна. Амма жула учала бурхха, аршибакъуйн варанттуйгу ккаччи ххяххайссар, тIисса. Жул къатраву цавайннал къатравун цуркинт бувххун, чIярусса затру дарцуну дия. Мукун бунагу, жула шава мудангу инсан икIайхха, тIий, муксса къулагъас къадурссия. Цуркинт хъирив бавцIуну бухьунссия. Жул къаттагу гайннал дя-дяхтта бавцуна. Мискинссар тIисса жула ужагърай миксса давлат бивкIшиву – му цуркинтрал кIул бувна. Му хавар цукуннив Марияннун бавну, «Дараччи» клубравун ухьхьу, куну, ялунбихьу бувну бия. Лавгукун, ххуйсса мукъурттийну алалавгу бувну, лакку маз лахьхьай лу итабакьинсса 100 азарда къуруш ттухьхьун дуллуна.
Му луттирал бивщуссия 500 экземпляр. Нагу ттунма 50 экземпляр бивтун, гайми Мариян ЧIибиевнахьхьун хъунмасса барчаллагьращал буллуссия. Му луттираяту хъинну рязину бикIай. Жува му уттигу итабакьиннухха, увкуна Марияннул.
Мариян Илиясова хъинну дугърисса инсан бикIайва. Цикссагу чумартшивуртту данссия ганил уттигу. Ччяни ва дунияллия лавгун, махIрум бунни лавмартсса бивкIулул, ганил цила кулпат (лас, оьрчIру, гъан-мачча) бакъасса, хъаннил клубравусса цилагу, лакралгу дустал бакъасса, щалагу лакрал миллат.
