[dropcap]Я[/dropcap]нварьданул 13-нний, Аьрасатнал Печатьрал кьини Дусшиврул къатраву Дагъусттаннал БакIчинал кIанайма Владимир Васильев хьунаавкьунни республикалул СМИ-рдал вакилтуращал.Журналистътурахь пишалул байран барчагу куну, Владимир Васильевлул бувсунни Дагъусттаннай хъин чулийсса дахханашивуртту даврил ххуллий хъунмасса бияла бушиву журналистурахь, инфомарциялул зузалтрахь.

---

[dropcap]Х[/dropcap]ьунабакьаврий гьуртту хьунни мукунма Дагъусттаннал парламентрал спикер Хизри Шихсаидов, ДР-лул ХIукуматрал председатель Аьбдуссамад ХIамидов, ДР-лул БакIчинал ва ХIукуматрал Администрациялул каялувчи Владимир Иванов, министртал ва цаймигу къуллугъчитал.
Сайки кIира ссятрайсса ихтилатраву Владимир Васильевлул жавабру дуллунни журналистътурал буллусса ацIвахъул суалла­хьхьун. Миннувасса цаппарассаннухьхьун жавабру дуллунни Хизри Шихсаидовлул ва Аьбдуссамад ХIамидовлул. КIицI лаганну миннува цаппара суаллу ва миннун­сса хаварду.

-Владимир Аьбдуаьлиевич, ина республикалул каялувчину ивтния шиннай хьунни 100 кьини. Цукунсса асарду загьир хъанай бур вил дакIний?
-Ттун ххива ттунма Дагъусттан кIулсса, цанчирча на шиккун даврил аьрххилий ччя-ччяни учIайсса ивкIун тIий. ЦIана тIурча, ттун шикку цамур сурат чIалачIи хьунни. На бакI лахIан дуллай ура республикалий аьдлу-низам дихьлахьиминнал, экономика гьаз дуллалиминнал хьхьичI, ттун ччай бур миннал хIурмат буван, миннал даврин кьимат бищун.
Амма мура чIумух чIявусса бур дузрайн буккан къабувсса хъинну агьамсса масъаларттугу. Миннувасса ца хъанай бур налогру дучIан дуллалаврил масъала. Аьркинссар налогру ратIлан ва ми ишла дуллан агьалинал мурадру бартлагаврил иширттан.
Аьмну лавсун, республикалиясса асар ххуйсса бур, хъинну хIалимсса, хъамал ххирасса инсантал бур.

-ЦIанасса ппурттуву рес­публикалул социал-экономикалул иш-тагьар цукунсса дур, ларгмур шинал давурттал хIасиллайн чул бивщуну? Хъинну хьунссия Дагъусттаннай дуллалисса хъуни­сса давурттайн республикалул СМИ-рдал зузалтрайнгу оьвчаварча, агьалинан гьарзатрая хавар бикIаншиврул.
-Ттул пикрилий, му ххуйсса иш хьунссия. Зу хIала-гьурттуну бикIан аьркинссару, жу дуллалисса циняв давурттавух, жун кумаг буллан аьркинссару кабакьлан аьркинссару, къатIайламур дащуй бихьлан аьркинссару. Ларгсса шинал хIасиллал хIакъираву тIурча, ттучIасса кка­ккияртту хъин чулийсса дур. Диялдакъашивурттая гъалгъа къатIийгу къабучIир, амма ми диялдакъашивурттая лапва чIявуну ихтилат­ру буллайгу къахъинссар, хаснува экономикалувусса диялдакъашивурттая. Аьмну лавсун жучIава лябуккулул бущи (темпы роста) къаоьккисса бур, амма микку дур захIматшивуртту. Масалдаран, жучIара дурну дур чIярусса къатри, амма дакъар лайкьсса коммуникацияртту, дузалшиннар­тту дакъар градостроительствалул аьямсса, дакъар цIакьсса план. Ттинияр тинмай мукун зун къабучIиссар.
-ЛачIун буккаврил ххуллий Дагъусттаннал Аьрасатнал цачIундур командалуву тамансса хьхьичIунсса кIанттурду бугьайссия. Утти тIурча, Дагъусттаннал цачIундур командалул ишру къамуксса ххуйну бур: лихълай бур тренертал ва лачIунбуккулт чил билаятирттайн. ЧIал дакъа хьун най дур Европанал чемпионат. Ччай бур му масъалалух ина къулагъас дурну.

Аьбдуссамад ХIамидов:
— Дагъусттаннай лачIун бу­ккаврил спортрал цалчинмур кIану бугьлагьиссар, жучIава бур республикалулгу, билаятралгу цIа гьаз дурсса чIявусса цIанихсса лачIунбуккулт. Суалданухьхьун балжийсса жаваб дулунна: цучIав чунчIав лихълай акъассар, нажа-мажагьсса акъа. Бур цаппара тренертал, цан 10 азарва доллар харжирал биша тIисса. Амма жуща цIанасса ппурттуву миксса харжру бишин бюхълай бакъар. Аьмну ласурча, Дагъусттаннай спортрал олимпий журардах хъинну къулагъас дуллай буссар. Мяйжаннугу бур цаппара тренертал ва спортс­ментал республикалул ва билаятрал дазул кьатIув лавгсса. Цаппара, 4,5,6-ми кIанттурдайсса, спортсментурахьхьун жу ихтияр дулару чил билаятрахлу лачIун буклан гьан, миннаща Европанал, дуниялул чемпионатирттай, Олимпиадалул тIуркIурдавух гьуртту хьуну, цалла цIа дуккан дуван бюхъаншиврул. Масалдаран, Шарип Шарипов лавгунни Азирбижаннахлу уклан, тийх хьунни Олимпиадалул чемпионгу.

-ЧIярусса лабизавуртту дур МахIачкъалалив бири-биривсса кIанттурдай къатри дуллай бур, бачI­васса кIанттурду битан най бакъар, тIисса. КъадикIайссарив къатри цила низамрай, пландалий дуллансса балжийсса стратегия?
-Жун чIалай бур му захIмат­шиврухун багьсса масъала бушиву. Къазакондалул ххуллий дуллай бивкIсса, дуллалисса давур­ттив цайми-цаймигу чансса дакъар. Жу букьан буванну зун къабюхълахъисса инсантал къуллугъир­ттаяту. Январьданул 17-нний жул тавакъюрайн бувну, Дагъусттаннайн учIантIиссар прокуратуралул 38 зузала, цайми улкраятусса. Генеральный прокурорнал тапшур бувну, жучIава ца зурул мутталий зунтIисса пишакарталли ми.

-ХIакьину Печатьрал кьини дур. Ина цукунсса кьимат бищунна республикалул СМИ-рдал давур­ттан?
-Нава чув зий ивкIхьурчангу, на даиман байссия СМИ-рдал зузалтрал хIурмат. Барчаллагь хьуннав му бигьа бакъасса ва уздансса пишалул ххуллий зузисса журналистътуран.
Ттул пикрилий, жулла дянив ххуйсса ара хьунсса ххай ура, кувн­нал кувннан кумаг буллай, цачIу дузрайн буккан булланну Да­гъусттан.

Хьунабакьаврий ххал бивгьунни ниттил мазру ябаврил хIакъиравусса масъаларттугу. Миннухьхьун жаваб дуллай, Владимир Васильевлул бувсунни му Да­гъусттаннан ххишала бакъа агьам­сса масъала бушиву ва мунил мурад бартбигьаврил ххуллий балжийсса давуртту дувантIий бушиву.
Ххал бивгьунни журналистътурал гьаз бувсса цаймигу масъалартту.