Кьурбан­махIаммадлул душ Юсупова Галина

Ноябрь зурул 12-нний, захI­матсса азаруннища ххассал къавхьуну, оьрмулул чагъираву аьпалухьхьун лавгунни ххаллилсса инсан, бакI — чурххал бювхъусса, я щунал я бацIайсса, Ккуллал шяраватусса Оьргъу­хъал КьурбанмахIаммадлул душ Юсупова (Оьргъуева) Галина.
Ва бувну бур 1968-ку шинал МахIачкъалалив, цинявннан бусравсса профессор Оьргъухъал КьурбанмахIаммадлул ва Къянчихъал Надеждал кулпатраву. МарцIну ххювардай 17-мур школагу къуртал бувну, дуклан бувххун бур Дагъусттаннал университетрал экономикалул факультетрайн. Мугу ххуйну къуртал бувну, зий буссия личIи-личIисса давурттай. Оьр­мулул махъра-махъсса кьинирдайннин зий буссия Дагъус­ттаннал Пенсион фондрай отделданул хъунаманал хъиривмурну. Ци даврий зий бухьурчагу, Галина хъинну бусраврай бикIайва даврил уртакьтураву, лагма-ялттуцириннаву. Аькьлу бусса, итххявхсса, куртIсса кIулшивуртту дусса бия. Щалвагу Оьргъухъал тухумран ваниха чIалачIин дакъая, гьарманал дусгу, чул бищай ттарцIгу бия. Ци кьини бакIрачIан дучIарчагу, къаххирая цIуру- кIуру буллан, оьрмулия аьсивну гъалгъа тIун. Хъярчру ххирасса, яхIлувсса бия.
Оьсса азарданул щали­ххан къабивтунни Галина цина ххирасса ласная, уссурссунная, чIивисса, дахьва ряххилчинмур классраву дуклакисса душния.
Галинал бивкIулул кьурчIи­шиву кIидачIлай буру лас Сулайманнущал, душ Шамайщал, уссу ХIайдардущал, ссурвал Асиятлущал ва Мариянащал ва щалвагу Оьргъухъал тухумращал. Галинан къабуллумур оьр­мулул бутIа ванил душнин ххибувну лякъиннав, гьаттай нур дизаннав!

Ссутривав ва дяркъусса,
Марчривав кьутIлатIисса,
Марч, дяркъу дакъанура
Базурдавун гьис тIисса?

Бявкъу хавардануллив
Дунъял лухIи-цIан дурсса?
ЦIан ларгсса дунияллий
Жу микIлачIунгу бувсса?

Укуннагу жул дакIру
РатIнияр къумассия,
Къума-банд лаган бунну,
Гъюжу буккан бувунну.

Укунмагу бивкIурду
БухIлай, яхI бувайссия,
ЯхI буллай, бан къахъанай
Къиялий личIан бунну.

Галинай, чIурлил ссихьуй,
Бахтти бакъа бавал душ,
БавацIун тти инагу
Аьзав ккухIлахIи бунну.

Ккуллал жяматрал цIанияту Гулинжан
Кьурбанова,
Пенсионный фондрал коллектив, дустал, гьалмахтал

---

ДакIнихтуну хъуннасса кьурчIишивугу кIидачIлай , жижара буллай буру Ширвани Чаллаевлухь, ванал хъунама уссу
Мюрщи
жуятува батIул шаврийн бувну. Махъминнал оьрмурдай барачат бишиннав. Мюрщил рухI хъинний дишиннав.
«Илчи» кказитрал коллектив

---

Ттул бакъахьу
ххазинай

Мухтардул аьпалун

КIира шингу хъанай дур,
КIива гьантта лавг кунма.
Аьзиз ниттил дакIмур дур
Арс учIаннин ялугьлай.

Ттул бакъахьу ххазинай,
ДакIницIа багьсса парчай,
Вил ниттил парча багь дакI
ОьцIалайнна дур ттигу.

Буттая хавар буслай,
Бутта ккаккан ччай ур тIий,
Суратрахгу ялугьлай,
АьтIий ур вил чIиви арс.

Аман, Мухтар – ттул бюрний,
Изан ан ца минутрай,
Лагма-ялтту урувгун,
Цимурца даххана дан.

Цибайссар ттул оьрмулул,
Арсругу бакъасса тти –
КIия арс мукьра шинай
ХьхьичIа лавсун лавгун махъ!

Заннан ххирану тIийри
Бувцусса ттул бюрунттив.
Аманатгу ца вийнмар,
Я раппий, ххира Аллагь.
Нину Зинаида,

ш. ЦIуссаккул