[dropcap]О[/dropcap]ьрмулул 66 шинавусса Аьбдулмажид Чапалаевлул, МахIачкъалалив №101 маршрут­райсса «Газельданул» водительнал, хиял бартлагансса кумаг бунни ванайн барчаллагьрайсса пассажиртурал.

[dropcap]С[/dropcap]айки 3 шинал лажиндарай Аьбдулмажид нюжмаркьини уква пассажиртал буцлай, биян буллай уссар. ЦIубутIуй пассажиртал махIатталну бургайсса бивкIун бур багьа къаласара увкукун, яла аьдат хьуну бур, ванал маршруткалийн багьтари, нюжмаркьинирдай, багьа къаласлай. Журналистнал цIухху-бусу буллалини, Аьбдулмажид мукIру хьуну ур 25 шинай хIаж бувансса хияллай ушиву. Ванал хиялдания хавар хьуну бур «Оьмра-ХIаж» тIисса интернет-проектрал вакилтуран. Миннал Инстаграмрай баян бувну бур Аьбдулмажид хIажлийн тIайла уккан­сса арцу датIлатIишиву. 160 азарда къуруш датIин мурадрайсса сиптачитурал гацIана 175 азарда къуруш дартIун дур. КIул акъасса инсаннал гара кьини сиптачитурал карточкалийн 75 азарда къуруш тIайла дур­ккун дур. «Марва-тур» тIисса турфирмалул хъуниминналгу хIукму бувну бур Аьбдулмажид Чапалаев тIайланнасса рейсрай кьювкьу­сса багьлий тIайла уккан хIажлийн, лирчIми арцу, цама инсан тIайла уккан, дуркьун дур интернет-проектрал вакилтурал. Аьбдулмажидлун фирмалул офисрайн цайнма оьвкукун, циван оьвтIиссарив хаварвагу къабивкIун бур. Цува хIажлийн тIайла уккантIишиву бувсукун, ванал иттав ххаришиврул макь гьурххи хьуну дур. Цувама: «Уква пассажиртал биян буллай ушиву ляличIисса даву дакъархха, хъинбалдарал ххуллийсса давур­ттив дуллалаву гьарцагу бусурманчунал буржри», — тIий ур.

П. Рамазанова