[dropcap]Н[/dropcap]оябрь зурул 27-нний «Дагестан» РИА-лий республикалул журналистуращал хьунабавкьунни Дагъусттаннал инсаннал ихтиярду дуру­ччаврил уполномоченный Уммупазил Оьмарова, Дагъусттаннал ОНК-лул председатель Оьмар Оьмаров, Дагъусттаннал МВД-лул пресс-службалул хъунаманан кIанайсса Руслан ИбрагьимхIажиев.

А. Аьбдуллаева
Хьунабакьаврил мурад бия силистталул изолятордануву щяивкIсса Аким Къулиевлул цанна цала цIунцIияртту дурсса иширал хIакъираву бувчIин бавур­тту даву.
Ванияр кIива гьантлул хьхьичI, ноябрь зурул 25-нний, соцсетирдай бувксса машгьурсса спортсмен ХIабиб НурмахIаммадовлул пострал аваза бувтунни инсантуравун. Спортсмен буслай ур Ахттиял райондалул администрациялул къат­ри ччуччаврийн щак тIий увгьусса цала дус Аким Къулиевлул къадурсса тахсиркаршиврий мукIру хьу тIий цайва зулму буллай тIий цала цанна цIунцIия дуршиву. Интернетраву ванал дирхьуну дур оьттул гъулувгъусса Аким Къулиевлул сурат. Вара кьини Дагъусттаннал Виваллил иширттал министерствалул сводкарттай бувсун бур, ноябрь зурул 24-нний ИВС-ву (изолятор временного содержания) щяивкIсса цаннал кафельданул цIалцIух цала лякьлуй ва каний щавурду дуршиву, мунан медициналул кумаг бувшиву, цIанасса чIумал цIунцIияртту дурманал цIуллу-сагъшиврун цичIав нигьачIаву дакъашиву.
ДакIнийн бутан, райондалул администрациялул къатри ччурччу­ссия сентябрь зуруй. Ноябрь зуруй, къатри ччуччаврийн щак тIий, увгьуну ур шама, миннавух – Аким Къулиевгу. Бувгьуминнал гъан-маччами бур, минначIан ярагъ ва наркотикругу бивчуну, ялун му тахсиргу ккаклай бур тIий. Ми бур райондалул администрациялул къатри щилчIав къаччурччуссар, миннуцIух духсса токрал ххаллу сававну цIу ларчIссар тIий.
— Инсаннай цукунсса бунугу тахсир хьуну бухьурча, закондалийн бувну танмихI бан аьркинни, судрал кIул бан аьркинни хьуну бурив мунай тахсир, — чичлай ур НурмахIаммадов цала пострай.
Ва иширал хIакъираву був­чIинбавуртту дуллалисса ихтилат бунни Уммупазил Оьмаровал.
— СМИ-рдая жунма Аким Къулиевлун хьусса иширая баяйхту, жун багьлай бия, хъирив бивзун, тIайламур кIул бан. Ттул тавакъюрайн бувну ОНК-лул председатель Оьмар Оьмаров ва комиссиялул член Шамил Хадулаев алхIаткьини бивссар 1-мур силистталул изоляторданувун. Миннал ихтилат хьу­ссар Къулиевлущал ва изоляторданул хIакиннащал. ХIакьину на нава хьунабавкьура Къулиевлущал. Ттун яла кIул хьун ччисса зат му бия – Къулиевлун аьркинсса медициналул кумаг бувшиву. На муний мукIру хьура, Къулиевлуй цIуллу-сагъшиврун цукунчIавсса нигьачIаву дакъар, ххарцив дур, медициналул кумаг цIана мунан аьркин багьлай бакъар. Къулиевлул цалвагу бувсунни цанма аьркинсса кумаг изолятордануву бувшиву, уттуи­шин ан багьлагьисса кIанттурду бакъашиву, изоляторданул зузалт­рай цичIав тахсир бакъашиву. Цанна цала цIунцIия даврил хIакъираву ва бувчIин буллай ур мунийну цала масъалалух, яни цала къадурсса тахсиркаршиву бакIрайн ласун уллай бушиврух, жяматрал къула­гъас дан бан ччай уссияв тIий.
Силистта буллалийни, закондалул ххуттава бувксса кIанттурду хьунабакьайссар, му кьюлтIсса зат бакъар. Мукунсса кIанттурду хьунабакьлай бур билаятрал цинярдагу регионнай. Къулиевлул аьрзирал хIакъираву тIурча, прокуратура хъирив лаян аьркинссар мунал тIутIимур цуксса тIайласса бурив кIул бан, — увкунни Уммупазил Оьмаровал. Ванил бувсунни ва иширал ялув цивппагу бацIантIишиву, цIана цинявннан силистта къуртал хьуннин ялугьлан багьлай бушиву.
Хъирив ихтилат бувсса Оьмар Оьмаровлул бувсунни цала коми­ссиялул агьаммур мурад дуснакьирттай щябивкIминнал ихтиярду ссу­ссукьу къадаву бушиву.
— ЖучIан оьвкунни Аким Къулиевлул буттал, изолятордануву ванай зулму буллай бур тIий. Жу лавгру изоляторданувун. Увцуну бувкIунни зарал бивма. ТIайламур бусан, соцсетирдай чивчумунийн бувну, ттун ва захIматсса цIунцIияртту хьуну усса ххива. Къулиевлул лякьлуй дахьрасса ххарцив дия. ТIайлассар, бакIрай някI лавгсса кIанттурду бия. ЦIухху-бусу буллай, Къулиевлул бувсунни, полициялул зузалт бувкIун, цува увгьусса куц. Бувсунни цачIава лабивтун бивкIсса ярагъ (автомат, винтовка) цува рязину буллушиву зузалтрахьхьун. ЦIухла бихьлахьисса чIумал, цала курткалул жипливу лявкъу­сса спайсращалсса кьуцури тIурча, цал бакъар, му цачIан бувтун бур тIий ур ва.
-Изоляртордануву ванай цукунчIавсса зулму бан къабю­хъайссар. Махъсса 4-5 шинал лажиндарай изолятордаву мукун­сса ишру бувагу къавхьуссар, я хьун къабюхъайссар, — тIий ур Оьмар Оьмаров.
Дагъусттаннал МВД-лул пресс-службалул хъунаманан кIанайсса Руслан ИбрагьимхIажиевлул бувсунни Аким КъулиевлучIа ярагъ ва наркотикру лявкъушиву, мунай, администрациялул къатри ччуччаврийн щак тIутIаву ба­къасса, ярагъ ва наркотикру ябуллай ивкIшиврийгу (228-мур статья II бутIа ва 222-мур статья II бутIа) тахсир ккаклай бушиву. — Силистталул даву къуртал къархьуна, ссаячIав гъалгъа тIун бюхълай бакъар, — увкунни ванал.