[dropcap]М[/dropcap]ахIачкъалаллал администрациялул ва шагьрулул дяъвилул ва ихтиярду дуруччай къуллугъирттал Ветерантурал советрал цачIу щурущи дурну дуссар Хъун дяъвилул ветерантуран ва мушакъатминнан кумагрансса цаппара хIаллихшиннарду.
З. АьбдурахIманова
[dropcap]М[/dropcap]асалдаран, ва шинал майрай МахIачкъалалив Радищевлул цIанийсса кIичIираву лагьсса багьрансса даруртту бахлансса «36, 6» тIисса социал аптека тIивтIуссар. Утти тIурча, миву льготарду ласайсса халкьуннансса дарурттал сияхI хъунна дурну дур. Льгота ласайсса инсаннан цала участковый хIакиннал чивчусса дарурттащалсса чIапIи ва социал карточка ккаккан дарча гьассар.
Аптекалул хъунмур Эльмира МахIарамовал бусаврийну, акция щуруйсса вай дачIи шинал дяниву вайннал Хъун дяъвилул ва Венгернаву 1956 шинал хьусса иширттаву гьурттуну ивкIсса 76 ветераннан багьайсса дарурттал щаллушинна дурну дур. Шикку вайннан цукссагу кьювкьуну бацIайссар шагьрулул цайми аптекарттай лякъин къашайсса даруртту. КьатIушав уккан къашайсса ветераннансса даруртту ласун бюхъайссар маччаминнащагу, так карточка ккаккан дарча.
МахIачкъалаллал Ветерантурал советрал хъунама Заур Абасаьлиевлул бусаврийну, шагьрулул администрациялул цащава шайсса кумаг, аякьа, ургъил бан мудангу хIадурну бикIайсса бур вайннан. Гьуртту шайсса бур ветерантуран хасну дуллалисса акциярттавух ва шадлугъирттай. Мукунма хъунмасса кумаг ветерантуран бувайсса бур шагьрулул цаппара ишбажаранчитуралгу. Масалдаран, хъунисса ттучаннаву чIа-чIаннин баян бувайссар ччатI уква буллалисса ягу кIилий лагьсса багьран цаппара хъус дахлахисса акцияртту ва цаймигу чирилунсса давуртту.
