Декабрьданул 9-нний Москавлий хьунни Аьрасатнал футболданул, гьашину махъва-махъсса, турданул ирглийсса тIуркIу.Футболданул майданнив хьунадаркьунни Москавуллал «Динамо» ва МахIачкъалаллал «Анжи» командартту.

Руслан Къардашов
[dropcap]Т[/dropcap]IуркIулул байбихьулийва бивгьуну нанисса «Динамо» командалуща бювхъунни цалчинмур гол бакьин.
«Динамолул» гьужумчи Ташуевлул «Анжилул» къапулул ттурцIая арх бакъа биривсса ттуп гъапI учин бувну бавкьунни жула къапулувун. «Анжилул» гьужумчи Иванченколгу хьуна гол бакьинсса каши, ванал бивщуну гьан бувсса ттуп «Динамолул» къапулул ялувмур ттурцIайн щуну, чIарах лавгунни.
КIилчинмур таймрайгу «Динамо» командалул ца ялагу гол бавкьунни. ТIуркIулул дайлитIу хьуннин «Динамо» командалул цала къапу буруччаву ялтту бувккунни «Анжи» командалул гьужумнияр.
Гьужумгу цир, гьужумирал чIалачIин дуллай бия. Ахиргу тIуркIу 2:0 счетрайну къуртал хьунни.
«Анжилул» хъунама тренер Вадим Скрипченко тIуркIу къуртал хьуну махъ тIий ия:
— Жуща гьужум буллансса цIусса ххуллурду лякъин къавхьунни. Пикри буссия цамур куццуй бачин бан тIуркIу, дайдихьулийва жула къапулувух бивщусса голданул жул мурад лиян бунни».
«Динамо» — «Анжи» — 2:0
Голлу: Ташаев, 7; Луценко, 60
«Динамо»: Шунин, Хольмен, Шунич, Рыков (Козлов, 35), Морозов, Темников (Соснин, 78), Цаллагов, Соу, Ташаев (Обольский, 90+1), Луценко, Бечирай.
«Анжи»: Лория, Полуяхтов, Армаш, Тетрашвили, Аронин (Хубулов, 59), Бакаев, Брызгалов, Данченко, Маркелов, Лескано (Прудников, 45), Иванченко (Яковлев, 46).