Сяидлул душ Мусалаева ПатIимат (Любочка)
Декабрь зурул 14-нний лавгунни дунияллия Ххутрал шяравасса уздансса лакку хъамитайпа, Сяидлул душ Мусалаева ПатIимат. Бувссар ПатIимат 1947 шинал май зурул 14-нний Краснодардай.
Краснодардай ПатIимат зий буссия общепитрай, захIматрал передовик хIисаврай, мунил цIа машгьурну дуссия, тамансса хIукуматрал бахшиширттангу лайкь хьуссия. 2000 шинал МахIачкъалалив бивзун, бизнесрахун багьну буссия. ПатIимат бия жяматрангу, чIахху-чIарахнангу, архIал зузиминнангу бусравсса, оьнийгу-хъиннийгу инсантурал чIарав бацIайсса хъамитайпа. Мурччаяту иминсса пиш хIура къабайсса, ихтилат аьчухсса, дакI-аьмал хъинсса ПатIимат, бургъия кунма, чанигу, гъилишивугу нанисса бия, халкьуннал мунийн ттюнгъану Любочка учайссия. Цуппа чил кIанттай бувсса, хъунма хьусса бунугу, лакрал миллатгу, миллатрал аьдатругу ххирасса, диндалул ххуллу-ххагу цIакьну бурувччусса аслийсса лакку хъамитайпа бия. Гьарцаннащал бавкьусса, гьарманан хъинмур, ххуймур буван ччисса ПатIиматлул- Любочкал чIюлу-чанна бувссар цуппа кIулманал оьрмулул мутта.
ПатIимат дунияллия лагаврил кьурчIишиву кIидачIлай, жижара буллай буру арснахь Ибадуллагьлухь, душваврахь Шагьуннухь ва Дианахь, миннал наслулухь, гъан-маччацириннахь, агьлу-авладрахь -цинявннахьвагу. ПатIиматлул рухI алжаннул ххари дуваннав, гьаттай нур дизаннав!
Махънал оьрмурдай барачат бишиннав. Амин.
Ттулва язисса чIаххувщар, бавцIусса кIану ххуй байсса, ихтилат яну-кIукIлусса, тIуллу уздансса, дакI чумартсса, ка сахаватсса ПатIимат Мусалаева (Любочка)
дунияллия лагаву хъинну кьувтIунни. Жул ПатIимат – Любочка буссия цила дакIнил хъиншиврул чаннайн агьали кIункIутIи буллалисса, инсантурай дакI цIуцIаву дусса, аькьлу бусса, лак ххирасса, буттахъал аьдатирттал хIурмат бусса инсан. Ванил бивкIулул кьурчIишиву кIидачIлай, жижара буллай бура арснахь Ибадуллагьлухь, душваврахь Шагьуннухь ва Дианахь, гъан-маччацириннахь. ПатIиматлул оьрмулул барачат махъ ливчIун лякъиннав, цув Алжаннул ххари буваннав.
Ванин къабуллумур оьрмулул бутIагу наслулун ххибувну лякъиннав.
Качар ХIусайнаева
МухIсиннул арс МухIсимов Ризван
Хъун бакъасса хIаллай къашайгу хьуну, оьрмулул 84 шинаву, жуятува лавгунни ххаллилсса лаккучу, захIматрал ветеран, МухIсиннул арс МухIсимов Ризван.
Ризван увну ур 1933 шинал 1-мур ЦIувкIуллал шяраву МухIсиннул ва Рабиятлул кулпатраву. Шяраву 7 класс къуртал бувну, увххун ур МахIачкъалаливсса касму лахьхьай училищалувун. Ххювардай мугу къуртал бувну, зий ивкIун ур М. ХIажиевлул цIанийсса заводрай. Яла 4 шинайсса ветеринариялул техникумгу къуртал бувну, зий ивкIун ур 10 шинай Ккуллал райондалий ветлечебницалий.
Каспийскалийн ивзун махъ лавгун Бакуйн, ларсун хасъсса кIулшивугу, зий ивкIун ур 16 шинай «Махачкала» аэропортрай перевозкарттал отделданул инспекторну. Аэропортрал структура даххана шайхту, Ростовуллал аэропортрайн лавгун, электрикнал пишагу лавхьхьуну, зана ивкIун ур жула аэропортрайн, микку зий хьуну дур 17 шин. Гьунар бусса рационализатор хIисаврайгу ванал дурссар чIярусса дакIний личIансса давурттив.
Канил усттарсса, гьунар ххисса зузала бусравну ия даврил уртакьтуравугу.
Ризван аьпалухьхьун лагаврил кьурчIишиву кIидачIлай, жижара буллай буру кулпатрахь Загьидатлухь, арсурваврахь Сергейхь, Салманнухь, душварахь Зояхь, Эльмирахь, Ульянахь, куявтурахь, арсурваврал хъаннихь, гъан-маччанахь — цинявннахьвагу.
Ризваннул гьаттай нур лахъаннав, алжаннул ххари аннав, махъминнал оьрмурдай барачат бишиннав.
1-мур ЦIувкIуллал жямат
Ххутрал жямат
