Цинявннанагу ххирасса Ися

ЦIуссалакрал агьулданун чIявучин ххуйну кIулссар Къичурлухиял шяравасса Амирханнул арс Ися Амирханов. Цува авцIусса кIану чIюлу байсса ххаллилсса лаккучу, лавайсса даражалул пишакар, хъинсса бутта ва ттатта.


А. Аьбдуллаева
Декабрь зурул 22-нний Исян оьрмулул 82 шин хьунтIиссия. Вай гьантрай цинявппагу ва кIулми, гъан-маччами, дустал, хIурматрай дакIнийн утлай бия цаппара зурдардил хьхьичI аьпалухьхьун лавгсса Ися. Оьрмулуву чIявусса ккавкнугу, захIматшивурттал хьхьичI ник къарирщуну, цала хIарачатрал цува гьаз увсса инсан ия Ися.
Увну ур ва 1935 шинал Ккуллал райондалийсса Къичурлухиял шяраву Амирханнул ва Хамисатлул кулпатраву. ЗахIматсса хьуну дур дяъвилул шиннардийн тIайла дарцIусса Исял оьрчIшиву. Ччяни дунияллия лавгун бур ванал нину-ппу. ЧIивисса оьрмулуву ккарккун дур бизан баврил захIматшивурттугу. Нину-ппу аьпа­лухьхьун лавгсса чIумал Исян 5 шин диркIун дур, ссин Жавагьин – 3, уссин АхIмадханнун тIурча, дахьва 3 барз хьуну бивкIун бур. Ятинну ливчIсса оьрчIру бувцуну бур гъанчунал. Вай хъуни хьуну бур бавкьусса ва шяраву хIурматрайсса Амирхановхъал ва Кабиевхъал агьлу-авладрачIа.
Гъан-маччанал кIул хьун къабивтун бур оьрчIан нину-ппу бакъашиву. Чан хьун къабавцIуну бур вайннахсса аякьагу, ччавугу. ОьрчIругу цала хIарачат цала буллалисса, бюхъу-бажар, яхI-намус бусса хьуну бур.
ЦIуссалакрал школа къуртал бувну махъ аьрали буржгу лавхъун, 1956 шинал Ися увххун ур Донецкаллал машлул институт­равун. Институт къуртал байхту, бюхъу-бажар бусса Исяйн тапшур бувну бур дуки-хIачIиялул базалул складрал хъунаманал къуллугъ. Ватандалийн зана икIан ччай унува, цала чIивима уссу къакьаитан, Украиннавува авцIуну ур. АхIмадхан му чIумал спортрахун агьну ивкIун ур.
Гъурбатрайгу хъинну бусравну, хIурматрай бивкIун бунугу, цаппара хIаллава кIиягу уссу Дагъусттаннайн зана хьуну бур. КIинналагу бувну бур кулпатру.
Ися бусса оьрмулий зий ивкIун ур машлул аралуву, личIи-личIисса жаваблувсса къуллугъирттай. Ва ивкIун ур МахIачкъалаливсса «Спорттовары» ттучандалул директорну, Южно-Сухокумскалий ОРС-рал хъунаману, МахIачкъалалив «Волна» ресторандалул хъунаману, Дагпотребсоюзрал экспортрал ва импортрал базалий инженер-технологну. ЧIивима уссу АхIмадхан ивкIун ур спорт­рацIун дархIусса идарарттай личIи-личIисса къуллугъирттай. Хъунама хIисаврай, Ися мудангу уссурссуннаха, цинявппагу гъан-маччанаха аякьалий икIайсса ивкIун ур. Оьрму-хIал лавгун махъгу, Исял хъуннасса гьурттушинна дайва цала агьлу-авладрай ва шяраву хъанахъисса гьарица ишираву. Цинявппагу уссу-ссил оьрчIан, гъан-маччанан ххира­сса ия Ися.

Ва цувагу гьарнай дакI цIу­цIисса ивкIун ия. ХIакьину цинявппагу гъан-маччанан хъинну асар хъанай бур Ися акъашиву.